Britaniya parlamentining Jamoatlar palatasi (quyi palata) Boris Jonson hukumatiga ishonchsizlik votumini qo‘llab-quvvatlashdan bosh tortdi. Votum uchun 349 nafar deputat qarshi, 238 nafari esa yoqlab ovoz berdi, deb yozadi The Guardian.
Iyun oyida Britaniya parlamentida shaxsan bosh vazirga nisbatan ishonchsizlik votumiga ovoz berish bo‘lib o‘tgan edi. U ham muvaffaqiyatsiz tugagan, ammo iyul oyi boshida Jonson hukumatini 50 ga yaqin kishi tark etdi va bosh vazir iste’foga chiqishga majbur bo‘ldi. U o‘zi yetakchilik qiladigan Konservativ partiya va hukumatga yangi rahbar saylanmaguncha lavozimida qoladi. Yangi rahbar sentabr oyida saylanishi kerak.
Reuters xabariga ko‘ra, Jonson hukumatiga ishonchsizlik votumi bo‘yicha ovoz berish uchun hukumatning o‘zi tashabbus ko‘rsatgan. Bu Leyboristlar partiyasi va boshqa muxolif kuchlarning yangi parlament saylovlarini kutmasdan, hoziroq Jonson va uning kabinetini iste’foga chiqarishga undashlariga javob bo‘lgan.
Ovoz berish muvaffaqiyatsiz yakunlandi, chunki Jamoatlar palatasida ko‘pchilik o‘rinlarga ega bo‘lgan Konservatorlar partiyasi hozir umumiy saylov o‘tkazishdan manfaatdor emas – bunga xususan, partiyada yetakchi yo‘qligi sabab bo‘lmoqda, deb yozadi The Independent.
Izoh (0)