Shri-Lankada prezidenti vazifasini bajaruvchi bosh vazir Ranil Vikramasingxe mamlakatda davom etayotgan norozilik namoyishlari fonida favqulodda holat e’lon qildi. Bu haqda Reuters agentligi tegishli farmonga tayanib, xabar bermoqda.
Favqulodda holat “jamoat xavfsizligi, jamoat tartibini muhofaza qilish hamda jamiyat hayoti uchun zarur bo‘lgan ta’minot va xizmatlarni ta’minlash manfaatlarini ko‘zlab” joriy etilgan.
O‘tgan hafta, sobiq prezident Gotabaya Rajapaksa mamlakatni tark etganidan so‘ng ham Vikramasingxe favqulodda holat e’lon qilgan edi. Rasmiylar avvalgi farmonni qaytarib olganmi-yo‘qmi, uning muddati tugaganmi yoki Vikramasingxe 15-iyul kuni qasamyod qilganidan keyin farmonni qayta chiqarishga qaror qilganmi, noma’lum deydi agentlik.
Rajdapaksaning mamlakatni tark etgani haqidagi xabarlar 12-iyul kuni paydo bo‘ldi, ikki kundan keyin uning iste’fosi rasman qabul qilindi. Vikramasingxe sobiq prezidentning safdoshi va doimiy asosda davlat rahbari lavozimini egallashga asosiy da’vogar hisoblanadi. Biroq, uning tayinlanishi yangi tartibsizliklarni keltirib chiqarishi mumkin, chunki namoyishchilar uning ham ketishini talab qilmoqda, deb ta’kidlaydi Reuters. Vikramasingxe avvalroq parlamentdagi partiyalar tomonidan yangi hukumat tuzilganidan keyin iste’foga chiqishiga va’da bergan edi.
Shri-Lankada norozilik namoyishlari iqtisodiy inqiroz fonida bahorda boshlangan. Aprel oyida rasmiylar valyuta yetishmasligi tufayli zaruriy tovarlarni import qilish bilan bog‘liq muammolar ortidan tashqi qarzni to‘lamagan. 9-iyul kuni namoyishchilar davlat rahbarining rasmiy qarorgohini egallab oldi, tartibsizliklar davomida o‘nlab odamlar yaralandi.
Izoh (0)