Rossiya Xavfsizlik kengashi rahbarining o‘rinbosari Dmitriy Medvedev Qrimga hujum sodir bo‘lsa, Ukraina uchun qiyomat kuni kelishini aytdi.
“Interfaks”ning yozishicha, Medvedev bu haqda Volgogradda Ikkinchi jahon urushi faxriylari bilan bo‘lib o‘tgan uchrashuvda aytgan. Xavfsizlik kengashi rahbari o‘rinbosari “Ukraina hukumati vakillari bizga tahdid qilishga urinmoqda, men Qrimga hujumni nazarda tutyapman”, dedi.
Shu munosabat bilan aytmoqchimanki, shubhasiz, ular bunday gaplarning oqibatini tushunadi, oqibati esa aniqki, agar shunga o‘xshash biror nima sodir bo‘lsa, ularning barchasi uchun juda tez va og‘ir qiyomat kuni keladi, berkinish nihoyatda qiyin bo‘ladi.Medvedevning qo‘shimcha qilishicha, Ukraina va NATO davlatlarining Qrimni Rossiyaning bir qismi sifatida tan olishdan bosh tortishi “to‘g‘ridan to‘g‘ri va ochiq tahdiddir”.
Ukraina prezidenti ofisining maslahatchisi Mixail Podolyakning aytishicha, Dmitriy Medvedevning qiyomat kuni bilan tahdid qilayotgani juda achinarli.
“Navbatdagi bolani o‘ldirasizmi?” — deb so‘radi Podolyak Medvedevdan.
16-iyul kuni Ukraina Mudofaa vazirligi bosh razvedka boshqarmasi vakili Vadim Skibitskiy Ukraina armiyasi Qrimdagi Rossiya obyetktlariga, jumladan Qora dengiz floti kemalariga zarba berish uchun Amerikaning HIMARS baravar o‘t ochish reaktiv tizimlaridan foydalanishi mumkinligini aytgan edi.
Ukraina prezidenti ofisining maslahatchisi Aleksey Arestovich ham “dastlabki texnik imkoniyat paydo bo‘lishi bilanoq” Ukraina hududiy suvlari orqali o‘tadigan Qrim ko‘prigi hujumlar obyektiga aylanadi, degan.
Izoh (0)