Ganada o‘limga olib keluvchi Marburg virusi bilan kasallanish bo‘yicha dastlabki ikki holat rasman tasdiqlandi. Bu haqda Reuters xabar berdi.
Gana sog‘liqni saqlash xizmatining xabar berishicha, bemorlar yaqinda janubiy Ashanti mintaqasidagi shifoxonada vafot etgan. Shu oy boshida ularning namunalarida Ebola virusiga o‘xshash o‘ta yuqumli kasallik borligi aniqlangan edi. Bu Marburg virusi ekani tasdiqlandi.
G‘arbiy Afrika mamlakati sog‘liqni saqlash rasmiylarining aytishicha, ayni paytda 98 kishi bemorlar bilan aloqada bo‘lganlikda gumonlanib karantinga olingan.
“Gana sog‘liqni saqlash idoralari ehtimoliy epidemiyaga tayyorgarlik ko‘rish orqali kasallikka tezda javob berdi. Bu yaxshi, chunki zudlik bilan va qat’iy choralar ko‘rilmasa, Marburg osongina nazoratdan chiqib ketishi mumkin”, — dedi JSSTning Afrika bo‘yicha mintaqaviy direktori Matshidiso Moeti.
Marburgning davosi hozircha yo‘q, biroq shifokorlarning aytishicha, ko‘p suv ichish va muayyan simptomlarni davolash bemorning omon qolish imkoniyatini oshiradi. Virus odamlarga mevaxo‘r ko‘rshapalaklar orqali yuqadi va tana suyuqliklari orqali odamlar orasida tarqaladi. Kasallik bosh og‘rig‘i, isitma, mushak og‘rig‘i, qusish va qon ketishi kabi alomatlar bilan og‘ir kechadi, ko‘pincha o‘limga olib keladi.
JSST ma’lumotlariga ko‘ra, Afrikada oldingi epidemiyalar va vaqti-vaqti bilan uchraydigan kasallanish holatlari Angola, Kongo, Keniya, Janubiy Afrika va Ugandada qayd etilgan. Marburg infeksiyasining birinchi epidemiyasi 1967-yilda Germaniyada yuz bergan — yetti kishi vafot etgan. Umuman olganda, avvalgi epidemiyalarda o‘lim darajasi virus shtammi va vaziyatni boshqarishga qarab 24 foizdan 88 foizgacha bo‘lgan.
Izoh (0)