Aktrisa Nigina Jabborova “Afandining qizlari” jamoasini tark etdi. Bu haqida guruh asoschisi Muborak Abdullayeva o‘zining Instagram sahifasida ma’lum qildi. Buning aniq tafsilotlarini bilish maqsadida “Daryo” muxbiri Nargizaxon Murodova Muborak Abdullayeva bilan bog‘landi.
— Nigina bilan munosabatlarimiz yaxshi. Ayrimlar o‘ylaganidek kelishmovchilik sabab Nigina jamoamizdan ketayotgani yo‘q. U teatrda ishlashni yaxshi ko‘radi va filmlarda ham jiddiy rollarni ijro etish niyatida. Uning qarorini hurmat qildik. Ya’ni u vaynlarda suratga tushishni xohlamayapti. U ayni kunlarda Moskvadagi teatrlardan biri bilan shartnoma imzolamoqchi. Keyin dekabr oyida O‘zbekistondan ketib, 2023-yilni yangi ijod muhiti bilan qarshilashni niyat qilgan. Dugonamizga oq yo‘l tiladik. Endi Nigora bilan “Afandining qizlari”ni davom ettiramiz.
Odatda guruhni tark etganlar o‘rni yangi a’zolar bilan to‘lidiriladi. Xo‘sh, “Afandining qizlariga” ham yangi a’zo qo‘shiladimi? Bu savolimizga Muborak Abdullayeva quyidagicha javob berdi.
— Kasting asosida yordamchilar olishni rejalashtiryapmiz. Ammo ular guruh a’zosi bo‘lmaydi. Ya’ni asosiy rollarni Nigora ikkimiz ijro etamiz. Agar kastingdan o‘tgan qizlar orasida haqiqatan ham iste’dodli nomzod bo‘lsa, uni a’zolikka qabul qilishimiz mumkin. Ammo u buxoro shevasida gapirishi va Nigina yaratgan rolni takrorlashi kerakmas. Niginaning o‘rnini hech kim to‘ldirolmaydi.
Bundan tashqari, Muborak Abdullayeva “Afandining qizlari Istanbulda” nomli film suratga olingani haqida ham so‘zlab berdi.
— Vaynlar olishda ancha dangacha bo‘lib qoldik. Oxirgi paytlarda juda kam olayapmiz. Nigora serialda, meni Zo‘r TV telekanalidagi boshlovchilik ishlari bilan band bo‘lib qoldim. Nigina esa teatr uchun jonini beradi. Orada “Afandining qizlari Istanbulda” nomli sitkom film ham suratga olindik. Uni suratga olishda mashhur “Istanbullik kelin” serialida ikkinchi rejissor bo‘lib ishlagan Ahmed ko‘maklashdi. Nasib qilsa, serialimiz yaqin kunlarda tomoshabinlarga taqdim etiladi, — deydi aktrisa Muborak Abdullayeva.
Eslatib o‘tamiz, “Afandining qizlari” jamoasi 2020-yili karantin davrida tashkil etilgan. Guruh asoschisi Muborak Abdullayeva hisoblanadi. Nigora Abdullaxonova ma’lumoti bo‘yicha dirijyor hisoblanadi. Nigina Jabborova va Muborak Abdullayeva ea aktrisalik sohasida tahsil olishgan.
Mavzuga doir:
- Ijtimoiy tarmoqlarda ommalashayotgan kulgili roliklar qahramonlari — “Afandining qizlari” haqida ma’lumotlar
- 15 soniya uchun 500 dollar. O‘zbekistonlik taniqli vaynerlarning Instagram’dagi reklama narxi qancha?
- “Bitta klipga 1500 dollar evaziga suratga tushaman”. Telegram nimaligini bilmagan Xoliqjon vaynes qanday qilib internet yulduziga aylangani haqida (video)
- “Otasiz, uysiz yashash oson emas”. Millati tojik, Qozog‘iston fuqarosi bo‘lgan o‘zbekistonlik bloger Azoda bilan suhbat (foto)
Izoh (0)