Актриса Нигина Жабборова «Афандининг қизлари» жамоасини тарк этди. Бу ҳақида гуруҳ асосчиси Муборак Абдуллаева ўзининг Instagram саҳифасида маълум қилди. Бунинг аниқ тафсилотларини билиш мақсадида «Дарё» мухбири Наргизахон Муродова Муборак Абдуллаева билан боғланди.
— Нигина билан муносабатларимиз яхши. Айримлар ўйлаганидек келишмовчилик сабаб Нигина жамоамиздан кетаётгани йўқ. У театрда ишлашни яхши кўради ва фильмларда ҳам жиддий ролларни ижро этиш ниятида. Унинг қарорини ҳурмат қилдик. Яъни у вайнларда суратга тушишни хоҳламаяпти. У айни кунларда Москвадаги театрлардан бири билан шартнома имзоламоқчи. Кейин декабрь ойида Ўзбекистондан кетиб, 2023 йилни янги ижод муҳити билан қаршилашни ният қилган. Дугонамизга оқ йўл тиладик. Энди Нигора билан «Афандининг қизлари»ни давом эттирамиз.
Одатда гуруҳни тарк этганлар ўрни янги аъзолар билан тўлидирилади. Хўш, «Афандининг қизларига» ҳам янги аъзо қўшиладими? Бу саволимизга Муборак Абдуллаева қуйидагича жавоб берди.
— Кастинг асосида ёрдамчилар олишни режалаштиряпмиз. Аммо улар гуруҳ аъзоси бўлмайди. Яъни асосий ролларни Нигора иккимиз ижро этамиз. Агар кастингдан ўтган қизлар орасида ҳақиқатан ҳам истеъдодли номзод бўлса, уни аъзоликка қабул қилишимиз мумкин. Аммо у бухоро шевасида гапириши ва Нигина яратган ролни такрорлаши керакмас. Нигинанинг ўрнини ҳеч ким тўлдиролмайди.
Бундан ташқари, Муборак Абдуллаева «Афандининг қизлари Истанбулда» номли фильм суратга олингани ҳақида ҳам сўзлаб берди.
— Вайнлар олишда анча дангача бўлиб қолдик. Охирги пайтларда жуда кам олаяпмиз. Нигора сериалда, мени Zo‘r TV телеканалидаги бошловчилик ишлари билан банд бўлиб қолдим. Нигина эса театр учун жонини беради. Орада «Афандининг қизлари Истанбулда» номли ситком фильм ҳам суратга олиндик. Уни суратга олишда машҳур «Истанбуллик келин» сериалида иккинчи режиссёр бўлиб ишлаган Аҳмед кўмаклашди. Насиб қилса, сериалимиз яқин кунларда томошабинларга тақдим этилади, — дейди актриса Муборак Абдуллаева.
Эслатиб ўтамиз, «Афандининг қизлари» жамоаси 2020 йили карантин даврида ташкил этилган. Гуруҳ асосчиси Муборак Абдуллаева ҳисобланади. Нигора Абдуллахонова маълумоти бўйича дирижёр ҳисобланади. Нигина Жабборова ва Муборак Абдуллаева эа актрисалик соҳасида таҳсил олишган.
Мавзуга доир:
- Ижтимоий тармоқларда оммалашаётган кулгили роликлар қаҳрамонлари — «Афандининг қизлари» ҳақида маълумотлар
- 15 сония учун 500 доллар. Ўзбекистонлик таниқли вайнерларнинг Instagram’даги реклама нархи қанча?
- «Битта клипга 1500 доллар эвазига суратга тушаман». Telegram нималигини билмаган Холиқжон вайнес қандай қилиб интернет юлдузига айлангани ҳақида (видео)
- «Отасиз, уйсиз яшаш осон эмас». Миллати тожик, Қозоғистон фуқароси бўлган ўзбекистонлик блогер Азода билан суҳбат (фото)
Изоҳ (0)