Qashqadaryo viloyati Nishon tumanida direktor va o‘qituvchi bir-birini o‘quvchilar ko‘z o‘ngida kaltakladi. Bu haqda Nasafnews xabar berdi.
Qayd etilishicha, Nishon tumanida joylashgan kasb-hunar maktabi direktori o‘qituvchi bilan janjal qilgan. Xabarda holat shu yilning 15-iyul kuni sodir bo‘lgani haqida yozilgan.
“Videoda direktor va o‘qituvchi mushtlashuviga o‘quvchilar ham guvoh bo‘lib turishganini ko‘rish mumkin”, — deyiladi xabarda.
Qashqadaryo viloyati Ichki ishlar boshqarmasi holatga munosabat bildirdi. Keltirilishicha, holat 15-iyul kuni soat taxminan 11:00 lar chamasida Nishon tuman 2-son kasb-hunar maktabida yuz bergan. G.U. va X.O. ismli fuqarolar o‘zaro tortishib qolib, kelishmovchilik yuzaga kelgan.
Holat yuzasidan hozirda Nishon tuman IIB JXX HPB profilaktika inspektori tomonidan surishtiruv harakatlari olib borilmoqda.
Nishon tuman hokimligining ma’lumot berishicha, direktor va o‘qituvchi ayni vaqtda o‘zaro kelishib olgan. Bir-biriga nisbatan hech qanday adovat qolmagan va kelajakda do‘stona ruhda birgalikda ishlashga qo‘l tashlashgan.
Izoh (0)