Қашқадарёлик фермер Шаҳрисабз тумани ҳокими Абдусамад Ҳасановни буғдой ўғирлигида айблаб, «Абдусамад ака, энди бирорта трактор ҳам юборинг, ишчиларимга айтаман ғалланинг сомонини ҳам ортиб беради, олиб кетасиз», деганди. Туман ҳокими айнан шу фермерга камералар қаршисида савол-жавоб қилиш таклифини берган. Бу ҳақда «Дарё» мухбири хабар берди.
Фермер ва ҳоким мулоқоти ОАВ вакиллари иштирокида бугун, 14 июль куни бўлиб ўтиши режалаштирилган. Бироқ фермер номаълум сабабларга кўра, ваъда қилинган учрашувга келмаган.
Фермер ва ҳоким мулоқотини кузатиш учун воқеа жойига борган блогер Капитан Каримовнинг ёзишича, Шаҳрисабз тумани ҳокими жамоатчилик, хусусан журналист ва блогерларни тўплаб, фермер билан юзма-юз кўришишга, унинг барча саволларига камералар қаршисида жавоб беришга тайёрлигини билдирган. Аммо фермер ҳокимлик биноси олдигача келган ва номаълум сабабларга кўра, ичкарига кирмай ортига қайтган.
«Қизиқ! Нега ОАВ орқали ҳақ-ҳуқуқини талаб қилган фермер ОАВ вакиллари ва жамоатчилик йиғилган жойда ҳокимни саволлари билан савалаб ташламади? Ёки туман ҳокимлиги ахборот хизмати айтганидек, у ҳокимга туҳмат қилганмиди? Туҳмат қилмаган бўлса, бу унинг учун яхши имконият ва гапириш учун минбар эди-ку?», — дейди воқеа ҳақида фикр билдирган Қитмир мухбир.
Фермернинг ёнини олган ижтимоий тармоқ фойдаланувчиси бу вазиятга изоҳ бериб, «барака топгурлар, ахир фермернинг отаси яқинда оламдан ўтган. Бугун эрталаб худойи қилиб бераётган эди. Қандай қилиб борсин фермер? Ҳоким инсон бўлса, нега фермернинг уйига бормади», — деган. Блогер Капитан Каримов эса постига ёзилган мазкур изоҳни ўчирган. Сабаби ҳозирча номаълум.
Аввалроқ Шаҳрисабз тумани ҳокимлиги фермер туман ҳокимига туҳмат қилганини ёзиб, фермер ва бошқалар устидан туман ИИБга шикоят қилганини маълум қилганди.
«Дарё» воқеалар ривожини кузатишда давом этади.
Изоҳ (0)