O‘zbekistonda 2022-yilning yanvar-iyun oylarida charm-poyabzal sohasida jami qiymati 2,3 trillion so‘mlik sanoat mahsulotlari ishlab chiqarilgan.
Shundan:
- 57,4 million juft poyabzali mahsulotlari (110,4%);
- 887,6 million kv/dm (109,7%) charm mahsulotlari;
- 55,7 mlrd so‘mlik charm attorlik mahsulotlari (113,5%);
- 641,2 milliard so‘mlik (105,8%) boshqa turdagi tovar mahsulotlari ishlab chiqarilishi ta’minlandi.
Misol uchun, Toshkent viloyatidagi jami qiymati 5 million dollar bo‘lgan “Egida Simakx” MCHJ QK tomonidan yiliga 10 ming tonna charm-poyabzal sanoati uchun paralon mahsulotini ishlab chiqarish, Samarqand viloyatidagi jami qiymati 4 million dollar bo‘lgan “SN Group” MCHJ tomonidan yiliga 4 ming tonna charm-poyabzal sanoati uchun turli granitol va karton mahsulotlarini ishlab chiqarish yo‘lga qo‘yildi.
2022-yilning birinchi olti oyligida sohaga rejaga nisbatan 2 barobar ko‘p, ya’ni 16,5 million dollarlik investitsiyalar o‘zlashtirildi va jami qiymati 35,1 million dollarlik 24 ta yangi loyihalar amalga oshirildi.
Jumladan, 29,7 million dollarlik 17 ta loyiha har xil turdagi poyabzal mahsulotlari, 3,5 million dollarlik 2 ta charm-attorlik mahsulotlarini ishlab chiqarish loyihalari, 0,3 million dollarlik 1 ta junni qayta ishlash va 1,5 million dollarlik 4 ta zamonaviy avtomatlashtirilgan kushxonalar faoliyatini tashkil etish loyihalari ishga tushirildi.
Ishga tushirilgan 24 ta yangi loyihalar natijasida sohada 375 mlrd so‘mlik yangi quvvatlar va 1 280 ta yangi ish o‘rinlari yaratildi.
2022-yil birinchi yarim yilligida sohada 198,2 million dollarlik charm-poyabzal mahsulotlari eksport qilinishiga erishilgan bo‘lib, ularning 86,4 foizi tayyor va 13,6 foizi yarim tayyor mahsulotlar ulushiga to‘g‘ri keldi.
Shuningdek, o‘tgan yilning mos davriga nisbatan eksport qilinayotgan charm-poyabzal mahsulotlari turlari 48 dan 65 ga oshgan bo‘lsa, eksport geografiyasi 32 davlatdan 42 taga oshdi. Jumladan, AQSH, Yaponiya, BAA va Koreya kabi yangi davlatlarga eksport qilinishi yo‘lga qo‘yildi.
Shuningdek, yanvar-iyun oylarida “O‘zcharmsanoat” uyushmasi va Investitsiyalar va tashqi savdo vazirligi huzuridagi “O‘zbekiston texnik jihatdan tartibga solish agentligi” bilan hamkorlikda uyushmaga a’zo charm-poyabzal mahsulotlarini ishlab chiqaruvchi 392 ta korxonalarda sifat menejmenti tizimini joriy etish holati tahlili o‘tkazildi. Tahlil natijasida 49 ta (shu jumladan: terini qayta ishlovchi 14 ta, poyabzal ishlab chiqaruvchi 33 ta va charm-attorlik mahsulotlarini ishlab chiqaruvchi 2 ta ) korxonada xalqaro sifat menejment tizimi joriy etildi.
Tegishli qaror va dasturlarga asosan soha korxonalari tomonidan 2026-yilga borib sanoat mahsulotlari ishlab chiqarish hajmlarini 18,6 trillion so‘mga yetkazish, ya’ni 2021-yilga nisbatan 4,2 marta oshirish nazarda tutilgan.
Xususan, 2022-yil yakuniga kelib sanoat mahsulotlarini ishlab chiqarish hajmini 5 trillion 530,8 mlrd so‘mga yetkazish ko‘zda tutilgan. Amalga oshirilayotgan ishlar natijasida yillik poyabzal ishlab chiqarish quvvati 205,3 million juftga, charmdan kiyim-kechak 35,3 ming donaga, charm-attorlik mahsulotlari hajmi 120,3 mlrd so‘mga, charm mahsulotlari hajmi 2 mlrd 179,4 million kv/dm yetkazish maqsad qilingan. Shuningdek, 2022-yil yakuni bilan sohaning eksport ko‘rsatkichlarini 450 million dollarga yetkazish maqsad qilingan.
Ushbu vazifalarni amalga oshirish uchun 2022-2026-yillarda soha bo‘yicha jami qiymati 1 mlrd dollar bo‘lgan 555 ta investitsiya loyihalari shakllantirilgan bo‘lib, shundan 218 million dollarlik 120 tasi joriy yilda foydalanishga topshirilishi ta’minlanadi.
Izoh (0)