Farg‘onada 112 mln so‘mlik kuchli ta’sir qiluvchi dori vositalari muomalasiga chek qo‘yildi

Farg‘ona viloyatida kuchli ta’sir qiluvchi dori vositalarining muomalaga kiritilishi oldi olindi, deya xabar berdi “Daryo” muxbiri.

Qayd etilishicha, viloyat bojxona boshqarmasi tezkor tuzilmalari tomonidan “Farg‘ona” chegara bojxona posti xodimlari bilan hamkorlikda Farg‘ona shahrida tezkor tadbir o‘tkazilgan.

Tadbir davomida fuqarolardan biri boshqaruvidagi Spark avtomashinasi xolislar ishtirokida ko‘zdan kechirilgan.

Tekshiruv natijasida avtomashinadagi yo‘lovchiga tegishli bo‘lgan paketda xorijda ishlab chiqarilgan, sifati va bojxona rasmiylashtiruvini tasdiqlovchi hujjatlari bo‘lmagan qiymati 112 million so‘mlik 1 ming 120 dona “Regapen” kuchli ta’sir qiluvchi dori vositalari borligi aniqlangan.

Hozirda ushbu holat yuzasidan jinoyat ishi qo‘zg‘atilib, tergov harakatlari olib borilmoqda.