Ўзбекистонда 2022 йилнинг 6 ойда 2,3 трлн сўмлик чарм-пойабзал маҳсулотлари ишлаб чиқарилган

Ўзбекистонда 2022 йилнинг январь июнь ойларида чарм-пойабзал соҳасида жами қиймати 2,3 триллион сўмлик саноат маҳсулотлари ишлаб чиқарилган.

Шундан:

• 57,4 миллион жуфт пойабзали маҳсулотлари (110,4%);
• 887,6 миллион кв/дм (109,7%) чарм маҳсулотлари;
• 55,7 млрд сўмлик чарм атторлик маҳсулотлари (113,5%);
• 641,2 миллиард сўмлик (105,8%) бошқа турдаги товар маҳсулотлари ишлаб чиқарилиши таъминланди.

Мисол учун, Тошкент вилоятидаги жами қиймати 5 миллион доллар бўлган «Egida Simakx» МЧЖ ҚК томонидан йилига 10 минг тонна чарм-пойабзал саноати учун паралон маҳсулотини ишлаб чиқариш, Самарқанд вилоятидаги жами қиймати 4 миллион доллар бўлган «СН Group» МЧЖ томонидан йилига 4 минг тонна чарм-пойабзал саноати учун турли гранитол ва картон маҳсулотларини ишлаб чиқариш йўлга қўйилди.

2022 йилнинг биринчи олти ойлигида соҳага режага нисбатан 2 баробар кўп, яъни 16,5 миллион долларлик инвестициялар ўзлаштирилди ва жами қиймати 35,1 миллион долларлик 24 та янги лойиҳалар амалга оширилди.

Жумладан, 29,7 миллион долларлик 17 та лойиҳа ҳар хил турдаги пойабзал маҳсулотлари, 3,5 миллион долларлик 2 та чарм-атторлик маҳсулотларини ишлаб чиқариш лойиҳалари, 0,3 миллион долларлик 1 та жунни қайта ишлаш ва 1,5 миллион долларлик 4 та замонавий автоматлаштирилган кушхоналар фаолиятини ташкил этиш лойиҳалари ишга туширилди.

Ишга туширилган 24 та янги лойиҳалар натижасида соҳада 375 млрд сўмлик янги қувватлар ва 1 280 та янги иш ўринлари яратилди.

2022 йил биринчи ярим йиллигида соҳада 198,2 миллион долларлик чарм-пойабзал маҳсулотлари экспорт қилинишига эришилган бўлиб, уларнинг 86,4 фоизи тайёр ва 13,6 фоизи ярим тайёр маҳсулотлар улушига тўғри келди.

Шунингдек, ўтган йилнинг мос даврига нисбатан экспорт қилинаётган чарм-пойабзал маҳсулотлари турлари 48 дан 65 га ошган бўлса, экспорт географияси 32 давлатдан 42 тага ошди. Жумладан, АҚШ, Япония, БАА ва Корея каби янги давлатларга экспорт қилиниши йўлга қўйилди.

Шунингдек, январь июнь ойларида «Ўзчармсаноат» уюшмаси ва Инвестициялар ва ташқи савдо вазирлиги ҳузуридаги «Ўзбекистон техник жиҳатдан тартибга солиш агентлиги» билан ҳамкорликда уюшмага аъзо чарм-пойабзал маҳсулотларини ишлаб чиқарувчи 392 та корхоналарда сифат менежменти тизимини жорий этиш ҳолати таҳлили ўтказилди. Таҳлил натижасида 49 та (шу жумладан: терини қайта ишловчи 14 та, пойабзал ишлаб чиқарувчи 33 та ва чарм-атторлик маҳсулотларини ишлаб чиқарувчи 2 та ) корхонада халқаро сифат менежмент тизими жорий этилди.

Тегишли қарор ва дастурларга асосан соҳа корхоналари томонидан 2026 йилга бориб саноат маҳсулотлари ишлаб чиқариш ҳажмларини 18,6 триллион сўмга етказиш, яъни 2021 йилга нисбатан 4,2 марта ошириш назарда тутилган.

Хусусан, 2022 йил якунига келиб саноат маҳсулотларини ишлаб чиқариш ҳажмини 5 триллион 530,8 млрд сўмга етказиш кўзда тутилган. Амалга оширилаётган ишлар натижасида йиллик пойабзал ишлаб чиқариш қуввати 205,3 миллион жуфтга, чармдан кийим-кечак 35,3 минг донага, чарм-атторлик маҳсулотлари ҳажми 120,3 млрд сўмга, чарм маҳсулотлари ҳажми 2 млрд 179,4 миллион кв/дм етказиш мақсад қилинган. Шунингдек, 2022 йил якуни билан соҳанинг экспорт кўрсаткичларини 450 миллион долларга етказиш мақсад қилинган.

Ушбу вазифаларни амалга ошириш учун 2022-2026 йилларда соҳа бўйича жами қиймати 1 млрд доллар бўлган 555 та инвестиция лойиҳалари шакллантирилган бўлиб, шундан 218 миллион долларлик 120 таси жорий йилда фойдаланишга топширилиши таъминланади.