Qashqadaryo viloyatining Yakkabog‘ tumanida 38 yoshli ayol bir nechta erkak tomonidan kaltaklanib, sochi kesib tashlangani xabar berilgandi. Sevimli kanalining “Zamon” informatsion dasturida ma’lum qilinishicha, ayol qamchi bilan kaltaklangan.
“Jabrlanuvchining murojaatiga ko‘ra, holatni o‘rganib chiqqanimizda voqea 2022-yilning 9-iyul kuni kechasi soat 23:00 atrofida sodir bo‘lgani aniqlandi. Ayol o‘zidan 10 yosh kichik yigit bilan ishqiy munosabatda bo‘lib yurgan. Bu esa o‘g‘lini uylantirmoqchi bo‘lgan xonadon egasi va yigitning qarindoshlariga ma’qul kelmagan. Shu bois, ayol o‘sha yigit xonadoniga olib borilib, yigitning aka-ukalari tomonidan kaltaklangan”, — deydi Yakkabog‘ tuman IIBning xotin-qizlar masalalari bo‘yicha inspektori Dilafro‘z Mirzayeva.
Lavha muallifining aniqlashtirishicha, ayolni eri va uning qarindoshlari kaltaklagani haqidagi dastlabki ma’lumot noto‘g‘ri.
“Gap shundaki, eridan ajrashgan ayolning o‘zidan o‘n yosh kichik bola bilan ishqiy munosabati yigitning aka-ukalari g‘azabini keltiradi. Berilgan tushuntirishlar, ogohlantirishlar kor qilmagach, yigitning aka-ukalari ayolni jazolashga qaror qiladi. Va ayolni uyiga olib kelib, yigit va ayolning oyoq-qo‘lini bog‘lab, tongga qadar kaltaklashadi”, — deydi lavha muallifi.
Voqea sodir bo‘lgan “Yangi hayot” mahallasining xotin-qizlar faoli Dilshoda Umrzoqovaning ma’lumot berishicha, ayol va yosh yigitning qilmishi ko‘pchilikka ma’lum bo‘lgach, ularga to‘g‘ri maslahat berilgan. Ammo foydasi bo‘lmagan.
Tongga qadar kaltaklangan ayol tanishlari ko‘magida shifoxonaga olib borilgan.
“Ayol shifoxonamizga og‘ir ahvolda keltirilgandi. Hatto savollarimizga ham karaxt ahvolda javob qaytargandi. Singan joylari yo‘q, faqat yumshoq to‘qimalariga jarohat yetkazilgan. Bemorda yopiq bosh miya shikasti, bosh miya chayqalishi, boshning ikkala chakka tepa sohalari yumshoq to‘qimalari lat yeyishi va shilingani kuzatilgan. Shuningdek, uning tanasida tirnalgan jarohatlari bor edi”, — deydi shifokor.
Lavhada qo‘shimcha qilinishicha, 28 yoshli yigit va 38 yoshli ayolning munosabatiga to‘rt yil bo‘lgan.
“Menga unashtirilgan qiziga telefon qilib, uning xotini ekanimni aytishimni tayinladi. Va bu ishni amalga oshirdik”, — deydi kaltaklanishiga sabab bo‘lgan voqea kelib chiqishini izohlagan ayol.
Jurnalist savollariga javob bergan yigitning akasi otasining topshirig‘i bilan ukasi va ayolni topib, uyiga olib borganini aytib, “men ularni topib, otamga olib borib berdim, qolganini bilmayman”, deydi.
“O‘zim chavandozman. Oldindan uyimda qamchi bo‘lgan. Ayol dodladi, ammo mening kallam qizib ketgani uchun chidab turolmadim”, — deydi ayolni qamchi bilan kaltaklagan ota.
Mazkur voqea haqida fikr bildirgan viloyat hokimi o‘rinbosari, oila va xotin-qizlar boshqarmasi boshlig‘i Komila Karomova ayolning huquqini himoyalash uchun sudga murojaat qilinganini aytgan.
Eslatib o‘tamiz, avvalroq mazkur holat yuzasidan Yakkabog‘ tumani IIB huzuridagi tergov bo‘linmasi tomonidan fuqaro Yu.E, Yu.B va boshqalarga nisbatan Jinoyat kodeksining 138-moddasi 2-qismi “a” (jismoniy azob berib, zo‘rlik ishlatib g‘ayriqonuniy ravishda ozodlikdan mahrum qilish) bandi bilan jinoyat ishi qo‘zg‘atilgani, hozirda tergov harakatlari olib borilayotgani xabar qilingandi.
Izoh (0)