Ukrainadagi urush O‘zbekiston va boshqa MDH mamlakatlarining iqtisodiy o‘sishini sekinlashtirmoqda. Bu haqda “Kommersant” xabar bermoqda.
Iqtisodchilar yil oxirida Ukraina, Rossiya va Belarus retsessiyaga uchrashini taxmin qilmoqda.
O‘zbekiston, Qozog‘iston, Ozarbayjon va Gruziya sezilarli ijobiy o‘sish sur’atlarini saqlab qolishi mumkin, ammo ularda ham ishbilarmonlik faolligining sekinlashishi kutilmoqda.
Focus Economics’ning prognoziga ko‘ra, MDH+ mamlakatlari yalpi ichki mahsuloti joriy yilda 8,3 foizga qisqaradi.
Eng katta pasayish Ukraina iqtisodiyotida sodir bo‘ladi, Rossiya iqtisodiyoti ham inqiroz yuz beradi, qolgan mamlakatlarda pul o‘tkazmalari kamayishi, tashqi talabning zaiflashishi va inflyatsiya o‘sishi kuzatilishi mumkin.
Ukraina iqtisodiyoti joriy yilda 36,3 foizga qisqaradi — pasayish eksportning qisqarishi, infratuzilmaning vayron bo‘lishi va aholining mamlakatni tark etishi bilan bog‘liq.
Rossiya uchun prognoz o‘tgan oyga nisbatan oshirildi — uning iqtisodiyotida kutilayotgan retsessiya 9,8 foizdan 9,3 foizgacha kamaydi.
Iqtisodchilarning fikriga ko‘ra, retsessiya birinchi navbatda iste’mol talabining keskin pasayishi bilan bog‘liq bo‘ladi.
Qozog‘istonning 2022-yilgi o‘sish prognozi 2,7 foizdan 3,1 foizga ko‘tarildi. Bunga neft narxlarining yuqoriligi va xizmat ko‘rsatish sohasidagi o‘sish sabab bo‘ldi.
Armanistonda o‘sish sur’ati o‘tgan yilgi 5,7 foizdan 1,7 foizgacha, Qirg‘izistonda 3,6 foizdan minus 0,1 foizgacha pasayadi.
Yalpi ichki mahsulotning eng yuqori o‘sishi Gruziya (4,1 foiz), Ozarbayjon (4 foiz) va O‘zbekistonda (4 foiz) prognoz qilinmoqda.
Ammo bu uchala davlatda ham uning sur’ati o‘tgan yilgidan ancha past bo‘ladi. Inflyatsiya ham tezlashadi — Ozarbayjon va Gruziyada yil oxirida 11,6 foiz, O‘zbekistonda 11,4 foiz bo‘ladi.
Avvalroq 2023-yil uchun global retsessiya xavfi ortgani haqida xabar berilgandi.
Izoh (0)