Украинадаги уруш Ўзбекистон ва бошқа МДҲ мамлакатларида иқтисодий ўсишни секинлаштирди

Украинадаги уруш Ўзбекистон ва бошқа МДҲ мамлакатларининг иқтисодий ўсишини секинлаштирмоқда. Бу ҳақда «Коммерсантъ» хабар бермоқда.

Иқтисодчилар йил охирида Украина, Россия ва Беларусь рецессияга учрашини тахмин қилмоқда.

Ўзбекистон, Қозоғистон, Озарбайжон ва Грузия сезиларли ижобий ўсиш суръатларини сақлаб қолиши мумкин, аммо уларда ҳам ишбилармонлик фаоллигининг секинлашиши кутилмоқда.

Focus Economics’нинг прогнозига кўра, МДҲ+ мамлакатлари ялпи ички маҳсулоти жорий йилда 8,3 фоизга қисқаради.

Энг катта пасайиш Украина иқтисодиётида содир бўлади, Россия иқтисодиёти ҳам инқироз юз беради, қолган мамлакатларда пул ўтказмалари камайиши, ташқи талабнинг заифлашиши ва инфляция ўсиши кузатилиши мумкин.

Украина иқтисодиёти жорий йилда 36,3 фоизга қисқаради — пасайиш экспортнинг қисқариши, инфратузилманинг вайрон бўлиши ва аҳолининг мамлакатни тарк этиши билан боғлиқ.

Россия учун прогноз ўтган ойга нисбатан оширилди — унинг иқтисодиётида кутилаётган рецессия 9,8 фоиздан 9,3 фоизгача камайди.

Иқтисодчиларнинг фикрига кўра, рецессия биринчи навбатда истеъмол талабининг кескин пасайиши билан боғлиқ бўлади.

Қозоғистоннинг 2022 йилги ўсиш прогнози 2,7 фоиздан 3,1 фоизга кўтарилди. Бунга нефть нархларининг юқорилиги ва хизмат кўрсатиш соҳасидаги ўсиш сабаб бўлди.

Арманистонда ўсиш суръати ўтган йилги 5,7 фоиздан 1,7 фоизгача, Қирғизистонда 3,6 фоиздан минус 0,1 фоизгача пасаяди.

Ялпи ички маҳсулотнинг энг юқори ўсиши Грузия (4,1 фоиз), Озарбайжон (4 фоиз) ва Ўзбекистонда (4 фоиз) прогноз қилинмоқда.

Аммо бу учала давлатда ҳам унинг суръати ўтган йилгидан анча паст бўлади. Инфляция ҳам тезлашади — Озарбайжон ва Грузияда йил охирида 11,6 фоиз, Ўзбекистонда 11,4 фоиз бўлади.

Аввалроқ 2023 йил учун глобал рецессия хавфи ортгани ҳақида хабар берилганди.