Xalqaro energetika agentligi (IEA) rahbarining so‘zlariga ko‘ra, energiya ta’minotidagi yuzaga kelayotgan taqchillik, energiya va yoqilg‘i narxlarining oshishi hali uzoq davom etishi mumkin. Bu haqda Bloomberg xabar berdi.
Dunyo hali hech qachon bunday yirik energiya inqiroziga guvoh bo‘lmagan. Bu vaziyatda eng yomoni hali oldinda bo‘lishi mumkin, — dedi IEA ijrochi direktori Fotih Birol.
Birolning aytishicha, narxlarning ko‘tarilishi butun dunyo bo‘ylab gaz baklarini to‘ldirish, uylarni isitish va sanoatni energiya bilan ta’minlash xarajatlarini oshishiga sabab bo‘lgan.
Bu esa inflyatsiya bosimini kuchaytirib, Afrikadan Shri-Lankagacha bo‘lgan hududlarda noroziliklarga olib kelmoqda.
Shu bilan birga, neft va gaz yetishmovchiligi Yevropa uchun ham boshqa mintaqalar uchun ham yirik muammo bo‘lib qolmoqda.
Yevropada bu qish juda qiyin o‘tadi. Bu esa global iqtisodiyot uchun jiddiy oqibatlarga olib kelishi mumkin, — dedi Birol.
AQSH energetika vaziri Jennifer Granxolmga ko‘ra, global miqyosda toza energiyaga o‘tish eng katta tinchlik rejasi bo‘lishi mumkin.
IEA ma’lumotlariga ko‘ra, Xitoy quyosh energiyasi uchun global ta’minot zanjirlarining qariyb 80 foizini nazorat qiladi. Bu ko‘rsatkich 2025-yilga kelib 95 foizga ko‘tarilishi kutilmoqda.
Mustaqil toza energiya ta’minot zanjirlarini qurish orqali biz o‘z iqtisodiyotimizni keyingi inqiroz zarbalaridan himoya qila olamiz, — dedi Avstraliyaning iqlim o‘zgarishi va energetika vaziri Kris Bouyen.
Avvalroq dunyo 2025-yilgacha quyosh panellarini ishlab chiqarishda butunlay Xitoyga tayanishi haqida xabar berilgandi.
Izoh (0)