O‘zbekistonda aholi narxlarning sun’iy oshirilishi inflyatsiyaga bosim ko‘rsatishini ta’kidlagan — Markaziy bank

Markaziy bank iyun oyi uchun aholining inflyatsion kutilmalarini taqdim qildi (pdf).

Iyun oyida o‘tkazilgan so‘rov natijalariga ko‘ra, kelgusi 12 oy uchun narxlar o‘sishi bo‘yicha aholi vakillarining inflyatsion kutilmalari may oyiga nisbatan pasayuvchi dinamikani ko‘rsatdi.

Bunda aholining inflyatsion kutilmalari 16,4 foiz atrofida shakllangan bo‘lsa, mediana qiymati 14,1 foizni tashkil etdi.

Aholining inflyatsion kutilmalari dinamikasi va mediana ko‘rsatkichining iyun oyida o‘tgan oyga nisbatan pasayishiga ayrim oziq-ovqat mahsulotlari narxlarining barqarorlashishi sababli yuqoriroq inflyatsiyani kutayotgan aholi ulushi kamayib borishi bilan izohlanadi.

Inflyatsion kutilmalar — turli guruhlar bo‘yicha mos javobni belgilagan aholi sonining o‘sha javoblar o‘rtacha qiymatiga ko‘paytmalari yig‘indisini jami aholi soniga nisbati (o‘rtacha ko‘rsatkich).

Inflyatsion kutilmalarning mediana qiymati – kelgusidagi inflyatsiya bo‘yicha javoblar variatsion qatorini teng ikkiga bo‘luvchi qiymat.

Aholi tomonidan kelgusi davrda narxlarga oshiruvchi bosim ko‘rsatishi mumkin bo‘lgan asosiy omillar sifatida import tovarlari va asosiy oziq-ovqat mahsulotlari (56 foiz),

narxlarining sun’iy oshirilishi (41 foiz) hamda ish haqi va nafaqalarning oshirilishi (34 foiz) ta’kidlangan.

Ushbu oyda aholining devalvatsion kutilmalari pasayishda davom etdi (26 foizdan 25 foizgacha).