2020—2021-yillarda dunyo aholisi Ikkinchi jahon urushidan keyin birinchi marta yiliga 1 foizdan kamroq o‘sdi. Bu haqda Financial Times xabar berdi.
Jahon aholisi istiqbollari (BMT) haqidagi hisobotida, 2022-yildan 2050-yilgacha 61 mamlakat aholisining kamida 1 foizga qisqarishi prognoz qilinmoqda.
Biroq ko‘plab mamlakatlarda keksa odamlar ulushining ortib borayotgani iqtisodiy o‘sish va davlat moliyasiga ta’sir qilishi taxmin qilinmoqda.
O‘sishning sekinlashishiga qaramay, bu yil ham dunyo aholisi soni 8 milliard kishiga yetishi, kelgusi yilda esa Hindiston eng zich joylashgan mamlakat sifatida Xitoyni ortda qoldirishi kutilmoqda.
Joriy yilning 15-noyabriga qadar 8 milliardga yetadigan dunyo aholisi 2030-yilda 8,5 milliardga, 2100-yilda esa 10,4 milliardga o‘sishi mumkin.
Keyin esa qisqarish kuzatiladi — bu BMTning yillik hisobotida prognoz qilinadigan birinchi pasayishdir.
Yevropa aholisi 2020-yilda 744 mingga va o‘tgan yili 1,4 millionga qisqardi. Bu 1950-yilda qayd etilganidan buyon qit’adagi eng katta pasayish bo‘lib, o‘limning ko‘payishi, tug‘ilishning kamayishi va pandemiya bilan bog‘liq aniq migratsiyaning pasayishini aks ettiradi.
Osiyoda Yaponiya aholisi 2010-yildan beri qisqarmoqda, Janubiy Koreyada 2020-yilda kamayish kuzatildi, Xitoyda esa bu yil ham shunday bo‘lishi kutilmoqda.
Xitoy aholisi 2040-yillarning o‘rtalarida har yili taxminan 6 millionga, 2050-yillarning oxiriga kelib esa yiliga 12 millionga qisqarishi prognoz qilinmoqda — bu dunyodagi eng katta pasayish bo‘lishi mumkin.
Agar siz aholi soni kamayib borayotgan mamlakatlar xaritasiga qarasangiz, u asosan Yevropaning markaziy qismidan boshlanib, sharqqa Rossiya va Xitoy bo‘ylab Yaponiyagacha boradi, — dedi BMTning Iqtisodiy va ijtimoiy masalalar departamenti aholi bo‘limi direktori Vilmot.
Afrika 2020-yilda Osiyoni ortda qoldirib, aholi o‘sishining asosiy manbayiga aylandi. 2050-yilgacha prognoz qilinadigan o‘sishning yarmidan ko‘pi asosan Afrikada bo‘lib, tez o‘sish ularning iqtisodiy rivojlanishiga salbiy ta’sir o‘tkazishi kutilmoqda.
Izoh (0)