Shri-Lanka prezidenti Gotabaya Rajapaksa mamlakatni tark etgach, bosh vazir Ranil Vikramasingxe prezident vazifasini bajaruvchi etib tayinlandi. Bu haqda parlament spikeri Mahinda Yap Abeyvardenga tayanib, Ada Derana portali xabar berdi.
Spikerning so‘zlariga ko‘ra, prezidentning o‘zi “mamlakatdan uzoqda” bo‘lgani sababli u spikerga bosh vazirni prezident vazifasini bajaruvchi etib tayinlagani haqida xabar qilgan.
Avvalroq Abeyvarden Rajapaksa 13-iyul kuni iste’foga chiqishini aytgan edi, biroq bu hali sodir bo‘lmadi.
Vikramasingxe o‘z idorasi oldida davom etayotgan ommaviy norozilik namoyishlari fonida prezident vazifasini bajaruvchi etib tayinlandi. Bosh vazir xavfsizlik kuchlariga tartibni buzganlarni qo‘lga olishni va ularning transport vositalarini tortib olishni buyurdi. Politsiya namoyishchilarni tarqatish uchun suv purkagichlar va ko‘zni yoshlatuvchi gaz ishlatgan, deb yozadi Gagana.
Bosh vazir, shuningdek, mamlakatda favqulodda holat e’lon qildi va poytaxt Kolombo joylashgan G‘arbiy provinsiyada komendantlik soati joriy qildi.
Shri-Lankada mart oyidan beri mamlakatdagi iqtisodiy inqiroz sabab ommaviy norozilik namoyishlari o‘tkazilmoqda. Bahorda ushbu orol davlat defoltga uchradi. Mamlakatda import qilinadigan tovarlar, jumladan, oziq-ovqat, dori-darmon va asosiy tovarlarni sotib olish uchun zarur bo‘lgan valyuta yetishmayapti. Shri-Lankaning bir qator hududlarida elektr energiyasi doimiy ravishda uzilib qolmoqda, chunki energiya ta’minoti xorijiy uglevodorodlarning yetkazib berilishga ham bog‘liq. Iyun oyida mamlakatda inflyatsiya 50 foizdan oshdi, deb xabar beradi Bloomberg.
O‘tgan hafta namoyishchilar Kolombodagi prezident qarorgohiga bostirib kirdi. Rajapaksa tartibsizliklar ostida Shri-Lankani tark etdi. Prezident rafiqasi va tansoqchilari bilan birgalikda Maldiv orollariga qochib ketgan.
Namoyishchilar prezident va hukumat iste’fosini talab qilmoqda. Abeyvardenning so‘zlariga ko‘ra, Rajapaksa hokimiyatni tinch yo‘l bilan topshirish uchun 13-iyul kuni iste’foga chiqishga va’da bergan. Bosh vazir Vikramasingxe ham yangi hukumat tuzilganidan keyin lavozimni tark etishga rozi bo‘lgan.
Izoh (0)