LXR askarlarining dafn marosimi. Nikolayev yaqinidagi vayron qilingan qishloqlar. Urushning 139-kunidan fotoreportaj
12-iyul kuni Xerson viloyatining Nova Kaxovka shahrida (Rossiya qo‘shinlari nazorati ostida) Ukraina harbiylarining tungi zarbasidan keyin portlash davom etdi — Ukraina tomoni shahardagi o‘q-dorilar omboriga zarba berganini da’vo qilmoqda, Rossiya tomonining ta’kidlashicha, nishon selitra ombori bo‘lgan. Oqibatda shaharning besh nafar fuqarosi halok bo‘ldi, 80 nafari yaralandi, deb xabar beradi “RIA Novosti”. Donbass shimolida LXR askarlarining dafn marosimlari va tinch aholining vayron qilingan uylariga guvoh bo‘lish mumkin. 13-iyulga o‘tar Nikolayevda yigirmaga yaqin portlash ovozi eshitilgan. Meduza urushning 139-kunidan asosiy suratlarini e’lon qildi.
Donbass shimoli
Rossiya harbiy samolyotlari Severodonetsk ustida uchmoqda. Donbass shimolidagi ushbu shahar uchun shiddatli janglar bo‘ldi. Ukraina kuchlari iyun oyi oxirida chekindi.Foto: AFP
Slavyansk yaqinida buvisining uyidagi yong‘inni o‘chirayotgan erkak. Uy tungi aviazarbadan keyin yonib ketgan. Slavyansk yo‘nalishida Rossiya havo hujumlarini davom ettirmoqda, deb xabar qilmoqda Ukraina Qurolli kuchlari Bosh shtabi.Foto: AFP
Lisichansk aholisi qo‘lga olingan Ukraina tanklari va boshqa qurollar ko‘rgazmasi yonida gumanitar yordam olmoqda. Hozir shahar LXR nazorati ostida.Foto: AP Photo
Luganskda LXR armiyasining 58 nafar noma’lum askari dafn qilinmoqda. LXR vakillariga ko‘ra, 12-iyun kuni Ukraina Amerikada ishlab chiqarilgan HIMARS baravar o‘t ochuvchi reaktiv tizimlaridan shaharga to‘qqizta raketa uchirgan.Foto: Reuters
Nikolayev yaqinidagi Shevchenkovo qishlog‘ining o‘qqa tutilishidan keyin turar joy binosida yong‘in chiqdi. Ukraina Qurolli kuchlari Bosh shtabi ma’lumotlariga ko‘ra, Rossiya Ukraina Qurolli kuchlarining qayta guruhlanishiga yo‘l qo‘ymaslik uchun ushbu yo‘nalishni artilleriyadan o‘qqa tutgan.Foto: EPA
Nikolayev yaqinidagi bino devoriga urilgan raketa. 12-iyul kuni shahar qattiq talafot ko‘rdi: shifoxonalar va turar joy binolariga zarar yetdi. BBC ma’lumotlariga ko‘ra, bir nechta raketa va kassetali o‘q-dorilar ishlatilgan. Ukraina rasmiylari 12 kishi yaralanganini ma’lum qildi.Foto: EPA
Nikolayev yaqinida Ukraina askarlari mashinada ketmoqda. Ufq tomonda — otishmadan ko‘tarilgan tutun.Foto: EPA
Xarkov
Xarkov yaqinidagi front chizig‘ida Ukrainaning “Xartiya” batalyoni askarlari. Ukraina Qurolli Kuchlari Bosh shtabining xabar berishicha, bu mintaqada “asosiy harakatlar mudofaaga qaratilgan”.Foto: AP Photo
Ukraina harbiylari Xarkov yaqinidagi frontda patrullik qilmoqda. 12-iyul kuni rus qo‘shinlari Xarkovning turar joylarini yana o‘qqa tutdi. Qurbonlar yo‘q.Foto: AP Photo
Xarkov yaqinida “Xartiya” batalyoni askarlari front chizig‘idagi boshpanada.Foto: AP Photo
Xerson viloyati
Ukraina tomonidan o‘qqa tutilgan Nova Kaxovkadagi bino uzra ko‘tarilgan tutun. Shahar hozir rus qo‘shinlari tomonidan nazorat qilinmoqda. “TASS” va “RIA Novosti” agentligining rossiyalik harbiylar tomonidan tayinlangan shahar ma’muriyatidagi manbalari selitralar omborida portlash sodir bo‘lganini ma’lum qildi. Ukraina tomoni esa o‘qqa tutilgan nishon o‘q-dorilar ombori bo‘lganini da’vo qilmoqda.Foto: “TASS”
Nova Kaxovkadagi yarador kishi. Otishmada 80 kishi jarohatlangan, besh kishi halok bo‘lgan, yetti kishi bedarak yo‘qolgan. Bu haqda Xerson viloyatining rossiyaparast “rahbari o‘rinbosari”ga tayanib, “RIA Novosti” xabar bermoqda.Foto: “TASS”
Nova Kaxovkadagi singan deraza yonida turgan ayol. Tunda shahar o‘qqa tutilganidan keyin portlashlar ertalab ham davom etdi.Foto: “TASS”
Nova Kaxovkadagi uyning zinapoyasida yotgan bolalar. “TASS” va “RIA-Novosti” manbalarining xabar berishicha, shaharda Ukraina Qurolli kuchlarining hujumi oqibatida bozor, shifoxona va turar joy binolari zarar ko‘rgan.Foto: “TASS”
Izoh (0)