Germaniya 2022-yilning 1-avgustdan Rossiya ko‘mirini, 31-dekabridan esa Rossiya neftini sotib olishni to‘xtatadi. Bu haqda Germaniya moliya vaziri o‘rinbosari Yorg Kukis Sidneydagi anjumanda ma’lum qildi, deb xabar bermoqda Reuters.
Kukisning so‘zlariga ko‘ra, Germaniyada ko‘mir importining ham, neft importining ham 40 foizi Rossiya hissasiga to‘g‘ri kelayotgan edi.
“Sovet imperiyasining Sharqiy Yevropadagi quroli bo‘lgan ‘Do‘stlik’ neft quvuri tarixidan xabardor har bir kishi biladiki, bu qaramlikdan xalos bo‘lish arzimagan masala emas, biroq biz bunga bir necha oy ichida erishamiz”, — deydi Kukis.
Yevropa Ittifoqi aprel oyi boshida sanksiyalarning beshinchi paketi doirasida Rossiyadan ko‘mir importini butunlay taqiqlashga rozi bo‘lgan edi. Taqiq 10-avgustdan kuchga kiradi.
Oltinchi sanksiyalar paketi doirasida may oyi oxirida YI davlatlari tomonidan Rossiya neftini yetkazib berishni qisman taqiqlash haqida kelishib olingan. Embargo dengiz orqali neft yetkazib berishga taalluqlidir (Germaniya va Polsha esa “Do‘stlik” quvuri orqali neft sotib olishni to‘xtatadi) va 2022-yil oxiridan kuchga kiradi.
May oyida Germaniya kansleri Olaf Shols Rossiyadan ko‘mir import qilish yozda, neft import qilish esa yil oxirigacha to‘xtatilishini aytgan, biroq aniq sanalarni aytmagan edi.
Izoh (0)