Шри-Ланка президенти Готабая Ражапакса мамлакатни тарк этгач, бош вазир Ранил Викрамасингхе президент вазифасини бажарувчи этиб тайинланди. Бу ҳақда парламент спикери Маҳинда Яп Абейварденга таяниб, Ада Дерана портали хабар берди.
Спикернинг сўзларига кўра, президентнинг ўзи «мамлакатдан узоқда» бўлгани сабабли у спикерга бош вазирни президент вазифасини бажарувчи этиб тайинлагани ҳақида хабар қилган.
Аввалроқ Абейварден Ражапакса 13 июль куни истеъфога чиқишини айтган эди, бироқ бу ҳали содир бўлмади.
Викрамасингхе ўз идораси олдида давом этаётган оммавий норозилик намойишлари фонида президент вазифасини бажарувчи этиб тайинланди. Бош вазир хавфсизлик кучларига тартибни бузганларни қўлга олишни ва уларнинг транспорт воситаларини тортиб олишни буюрди. Полиция намойишчиларни тарқатиш учун сув пуркагичлар ва кўзни ёшлатувчи газ ишлатган, деб ёзади Гагана.
Бош вазир, шунингдек, мамлакатда фавқулодда ҳолат эълон қилди ва пойтахт Коломбо жойлашган Ғарбий провинцияда комендантлик соати жорий қилди.
Шри-Ланкада март ойидан бери мамлакатдаги иқтисодий инқироз сабаб оммавий норозилик намойишлари ўтказилмоқда. Баҳорда ушбу орол давлат дефолтга учради. Мамлакатда импорт қилинадиган товарлар, жумладан, озиқ-овқат, дори-дармон ва асосий товарларни сотиб олиш учун зарур бўлган валюта етишмаяпти. Шри-Ланканинг бир қатор ҳудудларида электр энергияси доимий равишда узилиб қолмоқда, чунки энергия таъминоти хорижий углеводородларнинг етказиб берилишга ҳам боғлиқ. Июнь ойида мамлакатда инфляция 50 фоиздан ошди, деб хабар беради Bloomberg.
Ўтган ҳафта намойишчилар Коломбодаги президент қароргоҳига бостириб кирди. Ражапакса тартибсизликлар остида Шри-Ланкани тарк этди. Президент рафиқаси ва тансоқчилари билан биргаликда Мальдив оролларига қочиб кетган.
Намойишчилар президент ва ҳукумат истеъфосини талаб қилмоқда. Абейварденнинг сўзларига кўра, Ражапакса ҳокимиятни тинч йўл билан топшириш учун 13 июль куни истеъфога чиқишга ваъда берган. Бош вазир Викрамасингхе ҳам янги ҳукумат тузилганидан кейин лавозимни тарк этишга рози бўлган.
Изоҳ (0)