AOKAda Sanoat xavfsizligi davlat qo‘mitasi rahbariyati ishtirokida o‘tkazilgan matbuot anjumanida 2022-yil 1-yarim yilligida amalga oshirilgan ishlar to‘g‘risida ma’lumot berildi.
Qayd etilishicha, nazorat ostidagi korxona va tashkilotlarda 1 692 ta davlat nazorati, 4 305 ta nazorat-profilaktika ishlari o‘tkazilgan. Natijada sanoat, radiatsiya xavfsizligi talablari va yer osti boyliklaridan foydalanish sohalarida 27 010 ta qoidabuzilish aniqlangan.
22 ta korxonada ishlar vaqtincha to‘xtatib qo‘yilgan. 1 521 ta injener-texnik va rahbar xodimlarga 1 milliard 186 million 598 000 so‘m miqdorida jarimalar qo‘llanilgan.
Sanoat xavfsizligi davlat qo‘mitasi nazorati ostidagi korxona va tashkilotlarda umumiy 42 ta baxtsiz hodisa sodir bo‘lgan. Bulardan 13 tasi o‘lim bilan tugagan. Qiyoslash uchun, 2021-yilning shu davrida bu ko‘rsatkich mos ravishda 44 va 10 ni tashkil qilgan. Bu borada qo‘mita tomonidan 28 ta hujjat huquqni muhofaza qiluvchi organlarga yuborilgan.
Sodir bo‘lgan baxtsiz hodisalar tahlili shuni ko‘rsatdiki, baxtsiz hodisalar 68,82 foiz holatda tashkiliy sabablar, ya’ni ishlab chiqarishda ishlarning to‘g‘ri tashkil etilmagani va xodimlarning sanoat xavfsizligi sohasida bilim darajasining pastligi, texnik va texnologik jarayonlarda ishlab chiqarish intizomining pastligi, ish bajaruvchining ehtiyotsizligi yoki tavakkalchilikka yo‘l qo‘yishi oqibatida yuzaga kelgan. Baxtsiz hodisalarning 31,18 foiziga texnik sabablar, ya’ni texnik jihozlar va qurilmalarning nosozligi, ularning konstruktiv yangilanmasligi, me’yoriy hujjat va loyiha talablarining buzilishi, texnik qurilmalarga xizmat ko‘rsatishda kamchiliklarga yo‘l qo‘yilishi sabab bo‘lgan.
Hududlardagi mavjud jami 143 ta madaniyat va istirohat bog‘ida o‘rnatilgan 1879 ta attraksion ko‘zdan kechirilgan. Ulardan xavfsiz foydalanish talablariga rioya etish holati o‘rganib chiqilgan. Natijada 574 attraksion vaqtinchalik to‘xtatilgan.
Izoh (0)