АОКАда Саноат хавфсизлиги давлат қўмитаси раҳбарияти иштирокида ўтказилган матбуот анжуманида 2022 йил 1-ярим йиллигида амалга оширилган ишлар тўғрисида маълумот берилди.
Қайд этилишича, назорат остидаги корхона ва ташкилотларда 1 692 та давлат назорати, 4 305 та назорат-профилактика ишлари ўтказилган. Натижада саноат, радиация хавфсизлиги талаблари ва ер ости бойликларидан фойдаланиш соҳаларида 27 010 та қоидабузилиш аниқланган.
22 та корхонада ишлар вақтинча тўхтатиб қўйилган. 1 521 та инженер-техник ва раҳбар ходимларга 1 миллиард 186 миллион 598 000 сўм миқдорида жарималар қўлланилган.
Саноат хавфсизлиги давлат қўмитаси назорати остидаги корхона ва ташкилотларда умумий 42 та бахтсиз ҳодиса содир бўлган. Булардан 13 таси ўлим билан тугаган. Қиёслаш учун, 2021 йилнинг шу даврида бу кўрсаткич мос равишда 44 ва 10 ни ташкил қилган. Бу борада қўмита томонидан 28 та ҳужжат ҳуқуқни муҳофаза қилувчи органларга юборилган.
Содир бўлган бахтсиз ҳодисалар таҳлили шуни кўрсатдики, бахтсиз ҳодисалар 68,82 фоиз ҳолатда ташкилий сабаблар, яъни ишлаб чиқаришда ишларнинг тўғри ташкил этилмагани ва ходимларнинг саноат хавфсизлиги соҳасида билим даражасининг пастлиги, техник ва технологик жараёнларда ишлаб чиқариш интизомининг пастлиги, иш бажарувчининг эҳтиётсизлиги ёки таваккалчиликка йўл қўйиши оқибатида юзага келган. Бахтсиз ҳодисаларнинг 31,18 фоизига техник сабаблар, яъни техник жиҳозлар ва қурилмаларнинг носозлиги, уларнинг конструктив янгиланмаслиги, меъёрий ҳужжат ва лойиҳа талабларининг бузилиши, техник қурилмаларга хизмат кўрсатишда камчиликларга йўл қўйилиши сабаб бўлган.
Ҳудудлардаги мавжуд жами 143 та маданият ва истироҳат боғида ўрнатилган 1879 та аттракцион кўздан кечирилган. Улардан хавфсиз фойдаланиш талабларига риоя этиш ҳолати ўрганиб чиқилган. Натижада 574 аттракцион вақтинчалик тўхтатилган.
Изоҳ (0)