Испания ва Португалияда юқори ҳарорат қайд этилмоқда, ҳафта охиригача аномал иссиқлик ўрнатилади. Метеорологлар эса ўрмон ёнғинлари бошланиши ва кенг тарқалиши хавфидан огоҳлантирмоқда, деб ёзади «Интерфакс».
Португалиянинг Алентежо вилоятида 13—14 июль кунлари ҳаво ҳарорати 46 даражага етиши кутилмоқда. Испаниянинг Кордова ва Севилья шаҳарларида ҳарорат 42 даражагача кўтарилади, Понтеведра провинциясининг худди шу номдаги пойтахтида эса термометрлар 41 даражани кўрсатиши мумкин, илгари ушбу ҳудудда бундай юқори ҳарорат кузатилмаган.
Пиреней яримороли мамлакатларининг ўт ўчириш бўлимлари шу ҳафтадан ўрмон ёнғинларига қарши курашни бошлаб юборди, метеорологлар ҳароратнинг кўтарилиши фонида ёнғинлар кучайиб, янада кенгайиши мумкинлигидан хавотирда.
Испаниянинг бир неча аҳоли пунктларида 400 га яқин аҳоли эвакуация қилинди, ўрмон ёнғинлари аллақачон 2,5 минг гектар майдонни қамраб олган. Шу билан бирга, ҳудудий қишлоқ хўжалиги бошқармаси бошлиғи Бегоня Гарсия Бернал ёнғин яқин орада назоратга олинмаслигини айтди. 300 га яқин ўт ўчирувчилар ва фавқулодда вазиятлар хизмати ёнғинни ўчиришга жалб этилган, уларга ёрдам бериш учун ҳарбий хизматчилар ҳам жўнатилган.
Португалияда ҳам ўт ўчирувчилар мамлакатнинг марказий қисмида, Сантарен шаҳри яқинида содир бўлган ёнғинни ўчиришга ҳаракат қилмоқда. Мамлакатдаги оғир вазият туфайли бош вазир Антонио Кошта Мозамбикга, президент Марсель Ребелу де Соуза эса Нью-Йоркка сафарини кечиктиришга қарор қилди.
Изоҳ (0)