“Manchester Yunayted” va “Barselona” Frenki de Yongni 85 million yevro evaziga transfer qilishga kelishib oldi.
Esport3 telekanalining Onze dasturida jurnalist Oriol Domenekning xabar berishicha, klublar 25 yoshli yarim himoyachining transferi miqdori bo‘yicha kelishib olishgan. Biroq summa qay tarzda to‘lanishi hali noma’lum. Bungacha 65+20 varianti ilgari surilgandi.
Shu bilan birga de Yong haligacha “Ayaks”da birga ishlagan Erik ten Hag bilan yana hamkorlik qilish imkoniyatiga qaramay, ko‘chib o‘tishga rozi emas.
Klublar futbolchini ko‘ndirishga harakat qilmoqda. Har ikki jamoa rahbarlari ushbu masalada bir necha bor uchrashuvlar o‘tkazgan. De Yong “Manchester Yunayted”ning joriy mavsumdagi asosiy transfer maqsadi hisoblanadi.
Avvalroq agar “Barselona” maosh va bonuslar hisobidan 20 million yevro qarzini to‘lab bersa, futbolchi ingliz klubiga o‘tishga tayyor ekani xabar qilingandi.
Izoh (0)