Robert Levandovski “Chelsi” variantini ham ko‘rib chiqishi mumkin. Tomas Tuxel uni Ronaldudan ko‘ra afzalroq deb biladi

“Bavariya” hujumchisi Robert Levandovski faoliyatini “Chelsi”da davom ettirishi mumkin.

CBS Sport jurnalisti Ben Jeykobsning xabar qilishicha, hujumchi “Barselona” variant o‘xshamasa, London jamoasiga o‘tish imkoniyatlarini ko‘rib chiqadi.

Kataloniyaliklar polshalik hujumchini o‘z safiga qo‘shib olishga ishonmoqda. Levandovskining o‘zi ham “Barselona”ga o‘tish istagida. Ikkala tomon muzokaralarni davom ettirmoqda, ushbu haftada siljish bo‘lishi kutilmoqda.

Levandovski har qanday vaziyatda ham “Bavariya”ni tark etmoqchi. “Chelsi” esa Rafinya Dias bilan bo‘lgan voqea takrorlanishidan xavotirda. “Lids” futbolchi bo‘yicha “ko‘klar”ning taklifini qabul qilgandi, ammo “ko‘k-anorranglilar” faollik ko‘rsatib, braziliyalikni o‘z tomonlariga og‘dirib oldi. Natijada “aristokratlar” Rafinya uchun kurashdan chiqqandi.

Agar Robert variant realda amalga oshiriladigan bo‘lsa, Tomas Tuxel buni qo‘llab-quvvatlaydi. Nemis murabbiyi uchun Levandovski “Manchester Yunayted” hujumchisi Krishtianu Ronaldudan ustunroq.

“PSJ” ham Levandovski atrofidagi voqealarni kuzatmoqda. Lekin ushbu transfer oynasida polshalik “Barselona”ga ko‘proq vaqt bermoqda.

33 yoshli hujumchi ortda qolgan mavsum Bundesligada 34 ta o‘yinda maydonga tushib, 35 ta golga mualliflik qildi.