“Bavariya” Joau Feliksga qiziqish bildirmoqda. “Atletiko” futbolchini 100 million yevrodan kamiga sotmoqchi emas

“Bavariya” Joau Feliks transferi bo‘yicha “Atletiko”ga taklif bilan chiqdi.

Myunxen klubi portgaliyalik futbolchiga qiziqish bildirmoqda. “Bavariya” sport direktori Hasan Salihamijich tarkibni 22 yoshli futbolchi bilan to‘ldirishni istamoqda.

Iyun oyida myunxenliklar “Atletiko”ga Feliksning potensial transferi bo‘yicha aloqaga chiqqan. Ammo “matraschilar” rahbariyati ushbu taklifga keskin rad javobini bergan. Hattoki 80 million yevro ham madridliklar futbolchini qo‘yib yuborishga sabab bo‘lmasligini bildirgan.

“Atletiko” Feliks uchun 100 million yevrodan kam bo‘lmagan narxni talab qilmoqda. “Bavariya” uchun esa bu qimmatlik qiladi.

Shuningdek, muzokaralarda Benjamen Pavar ismi ham tilga olingan. “Bavariya” Joau uchun narxi qisqartirish maqsadida Pavarni ushbu transferga qo‘shishni o‘ylamoqda. Qayd etilishicha, “Yuventus”dan Matteys de Ligt xarid qilinsa, Benjamenga chiqish eshiklari ko‘rsatiladi.