Farg‘onadagi bankomatlarda naqd pul yetishmovchiligi kuzatilmoqda

Ijtimoiy tarmoqlarda Farg‘ona viloyatida bankomatlardan naqd pul yechib olish bilan bog‘liq muammolar yuzaga kelayotgani haqida xabarlar tarqalmoqda.

“Daryo” o‘quvchisining ma’lum qilishicha, viloyatdagi bankomatlardan naqd pul yechib olish bilan bog‘liq muammolar 11-iyul kuni tushdan keyin kuzatila boshlagan. 12-iyul kuniga kelib esa aksariyat bankomatlarda naqd pul qolmagan.

Aholi “Agrobank”, “Mikrokreditbank”, “Milliy bank”, “Universalbank” va “Xalq banki”ga qarashli bankomatlardan naqd pul yechib olishda muammolarga duch kelayotgani aytilmoqda.

Bu haqda ma’lum qilgan “Daryo” o‘quvchisining aytishicha, u viloyatning bir necha shahar-tumanlaridagi o‘ndan ortiq bank shoxobchalarida bo‘lgan va bankomatdan naqd pul yechib ololmagan.

“Tuman markazlaridagi o‘ndan ortiq bankomatlarga borib ko‘rdim, hammasida ‘Bankomatda naqd pul qolmagan’ yoki ‘texnik sabablarga ko‘ra bu amaliyotni amalga oshirish mumkin emas’, degan yozuv chiqyapti”, — deydi “Daryo” o‘quvchisi.

Avvalroq ijtimoiy tarmoqlarda O‘zbekistondagi banklardan biri tajriba tariqasida bankomatdan yirik miqdorda naqd yechish uchun 1,5 foizdan 3 foizgacha komissiya o‘rnatgani haqidagi xabar tarqalgandi. Iqtisodchilar va boshqa soha vakillarining ayrimlari bu to‘g‘ri qaror ekani haqida yozsa, aksariyat faollar mazkur harakat xalqni ochiqdan-ochiq talash ekanini aytgandi. Mazkur holatga Markaziy bank munosabat bildirib, bayram kunlari munosabati bilan O‘zbekiston hududidagi 9,5 mingdan ortiq bankomatlarning uzluksiz ishlashi va yetarli miqdorda naqd pullar bilan ta’minlash choralari ko‘rilganini ma’lum qilgandi. Va bankomatlardan naqd pul yechish uchun komissiya to‘lovlari banklar tomonidan bankomatga xizmat ko‘rsatish xarajatlaridan kelib chiqib mustaqil belgilanadi va bugungi kunda 1 foizdan oshmaydi, degandi.

“Daryo” voqealar rivojini kuzatishda davom etadi.