Фарғонадаги банкоматларда нақд пул етишмовчилиги кузатилмоқда

Ижтимоий тармоқларда Фарғона вилоятида банкоматлардан нақд пул ечиб олиш билан боғлиқ муаммолар юзага келаётгани ҳақида хабарлар тарқалмоқда.

«Дарё» ўқувчисининг маълум қилишича, вилоятдаги банкоматлардан нақд пул ечиб олиш билан боғлиқ муаммолар 11 июль куни тушдан кейин кузатила бошлаган. 12 июль кунига келиб эса аксарият банкоматларда нақд пул қолмаган.

Аҳоли «Агробанк», «Микрокредитбанк», «Миллий банк», «Универсалбанк» ва «Халқ банки»га қарашли банкоматлардан нақд пул ечиб олишда муаммоларга дуч келаётгани айтилмоқда.

Бу ҳақда маълум қилган «Дарё» ўқувчисининг айтишича, у вилоятнинг бир неча шаҳар-туманларидаги ўндан ортиқ банк шохобчаларида бўлган ва банкоматдан нақд пул ечиб ололмаган.

«Туман марказларидаги ўндан ортиқ банкоматларга бориб кўрдим, ҳаммасида ‘Банкоматда нақд пул қолмаган’ ёки ‘техник сабабларга кўра бу амалиётни амалга ошириш мумкин эмас’, деган ёзув чиқяпти», — дейди «Дарё» ўқувчиси.

Аввалроқ ижтимоий тармоқларда Ўзбекистондаги банклардан бири тажриба тариқасида банкоматдан йирик миқдорда нақд ечиш учун 1,5 фоиздан 3 фоизгача комиссия ўрнатгани ҳақидаги хабар тарқалганди. Иқтисодчилар ва бошқа соҳа вакилларининг айримлари бу тўғри қарор экани ҳақида ёзса, аксарият фаоллар мазкур ҳаракат халқни очиқдан-очиқ талаш эканини айтганди. Мазкур ҳолатга Марказий банк муносабат билдириб, байрам кунлари муносабати билан Ўзбекистон ҳудудидаги 9,5 мингдан ортиқ банкоматларнинг узлуксиз ишлаши ва етарли миқдорда нақд пуллар билан таъминлаш чоралари кўрилганини маълум қилганди. Ва банкоматлардан нақд пул ечиш учун комиссия тўловлари банклар томонидан банкоматга хизмат кўрсатиш харажатларидан келиб чиқиб мустақил белгиланади ва бугунги кунда 1 фоиздан ошмайди, деганди.

«Дарё» воқеалар ривожини кузатишда давом этади.