Belarus hukumati mamlakatdan chiqish tartibini aniqlashtiruvchi qonun loyihasini ishlab chiqdi, deb yozadi Meduza. Parlamentning kuzda bo‘lib o‘tadigan sessiyasida ko‘rib chiqiladigan hujjatga “Zerkalo” nashri e’tibor qaratdi.
Tuzatishlarga muvofiq, Belarus Davlat xavfsizlik qo‘mitasi nafaqat profilaktika ro‘yxatida turgan fuqarolarning, balki “safari milliy xavfsizlik manfaatlariga zid” bo‘lgan fuqarolarning ham mamlakatdan chiqishini cheklashi mumkin. Bunday taqiq yarim yilgacha muddatga kiritilishi mumkin. Qanday fuqarolar va qanday asoslarda bu toifaga tushishiga qonun loyihasida aniqlik kiritilmagan.
Shuningdek, “boshqaruv tartibiga qarshi qonunbuzarliklar” bo‘yicha ma’muriy ishlar qo‘zg‘atilgan fuqarolarning ham Belarusdan chiqishi taqiqlanadi. Bungacha taqiq faqat ma’muriy jarimaga tortilgan va ularni to‘lamagan odamlarga nisbatan amal qilardi.
Respublika kuch organlari, shuningdek, qurolli kuchlar xodimlari uchun faqat ularning rahbariyati bilan muvofiqlashtirilgan holatda mamlakatdan chiqishiga ruxsat beriladi. “Milliy xavfsizlik manfaatlarini ta’minlash maqsadlarida” ularning mamlakatdan chiqishiga ham ruxsat berilmasligi mumkin.
Izoh (0)