Putin barcha ukrainaliklar uchun soddalashtirilgan tartibda Rossiya fuqaroligini olish huquqini joriy qildi

Rossiya prezidenti Vladimir Putin Ukraina, Donetsk va Lugansk xalq respublikalari fuqarolari soddalashtirilgan tartibda Rossiya fuqaroligini olishi mumkinligi haqidagi farmonni imzoladi, deb yozadi “RBK”. Hujjat huquqiy axborot portaliga joylashtirildi.

“Ukraina, Donetsk xalq respublikasi yoki Lugansk xalq respublikasi fuqarolari  yoki DXR, LXR va Ukraina hududida doimiy yashaydigan fuqaroligi bo‘lmagan shaxslar soddalashtirilgan tartibda Rossiya Federatsiyasi fuqaroligini olish uchun ariza bilan murojaat qilishi huquqiga egaligi belgilansin”, — deyiladi hujjat matnida.

Rossiya fuqaroligini olish uchun ariza bilan fuqaroligi bo‘lmagan, ammo migratsiya kartasi, vaqtinchalik yashash uchun ruxsatnoma, istiqomat guvohnomasi, qochqin guvohnomasi, vaqtinchalik boshpana taqdim etilgani haqida guvohnoma yoki o‘z ixtiyori bilan ko‘chish haqidagi davlat dasturi ishtirokchisining guvohnomasiga ega bo‘lganlar ham murojaat qilishi mumkin.

DXR va LXR aholisi soddalashtirilgan tartibda Rossiya fuqaroligini olish huquqiga 2019-yildayoq ega bo‘lgan bo‘lsa, Xerson va Zaporojye viloyatlari aholisi 2022-yil mayida bunday huquqni qo‘lga kiritgandi. Jarayon Rossiyada chet el fuqarosi yoki fuqaroligi bo‘lmagan shaxslarning fuqarolik olish uchun ariza berishgacha yashash muddatini bir yilgacha yoki undan ham kamroqqa qisqartirish imkonini beradi.