Yaponiyada hukmron Liberal-demokratik partiya parlament yuqori palatasiga saylovlarda g‘olib bo‘ldi, deb yozadi “Interfaks”.
LDP parlamentda 63 ta o‘ringa ega bo‘ladi, hukmron koalitsiyaga kiruvchi “Komeyto” partiyasi a’zolari yana 13 ta mandatni qo‘lga kiritadi. Shu tariqa, blokka 125 parlamentariydan 76 nafari vakillik qiladi.
Hukmron koalitsiya bilan birgalikda Konstitutsiyaga tuzatishlar kiritilishini qo‘llab-quvvatlovchi “Yaponiya innovatsiyalar partiyasi” parlament yuqori palatasida 12 ta o‘ringa ega bo‘ladi.
Shu bilan birga, tuzatishlar haqida referendum tashkil qilish uchun ikkala palatada ovozlarning uchdan ikki qismini qo‘lga kiritish kerak.
Yaponiya Konstitutisiyasining 9-moddasini o‘zgartirishni liberal-demokratlar talab qilmoqda. Ushbu modda mamlakat urush olib borishdan va o‘zining quruqlik, dengiz va harbiy-havo kuchlaridan voz kechishini ko‘zda tutadi. Yaponiya bosh qonuniga 1947-yildan buyon hech qanday o‘zgartirishlar kiritilmagan, ammo endi, Liberal-demokratik partiya bosh kotibi Toshimitsu Motegining so‘zlariga ko‘ra, xavfsizlik sohasida jiddiy o‘zgarishlar yuz bergan.
Yaponiyada saylovlar Yaponiya sobiq bosh vaziri va Liberal-demokratik partiya sobiq raisi Sindzo Abening suiqasd oqibatida vafot etishi fonida bo‘lib o‘tdi. Nara shahridagi saylovoldi tadbiri chog‘ida unga o‘q uzildi. Qotillikda 41 yoshli sobiq harbiy gumonlanmoqda. U o‘z aybiga iqror bo‘ldi.
Ikki marta (2006—2007 va 2012—2020-yillarda) bosh vazir bo‘lgan Abe Konstitutsiyaning 9-moddasi o‘zgartirilishi tarafdori edi. U qurolli kuchlardan voz kechishni nazarda tutsa ham, Yaponiyaning o‘z-o‘zini mudofaa qilish kuchlari bor. Ularning huquqiy maqomi bahsli bo‘lgani sababli, liberal-demokratlar bosh qonunga ushbu harbiy tuzilmaning roli va vakolatlarini yozib qo‘yishni taklif etmoqda.
Izoh (0)