Prezidentning tegishli qaroriga ko‘ra, Qurbon hayiti bayrami munosabati bilan 9—12 iyul sanalarida ketma-ket dam olish kunlari belgilandi. Sog‘liqni saqlash vazirligining xabar berishicha, shu kunlari ham tibbiyot muassasalari tun-u kun ishlaydi.
Qayd etilishicha, bayram va qo‘shimcha ishlanmaydigan kunlarda mamlakatdagi tibbiyot muassasalari faoliyatini muvofiqlashtirib borish maqsadida SSVda shtab tashkil etilgan. Bayram va qo‘shimcha dam olish kunlarida quyidagi davolash-profilaktika muassasalarida 40 ming nafar tibbiyot tizimi xodimi qonunda belgilangan tartibda, navbatchilik asosida aholiga xizmat ko‘rsatadi:
- 1010 ta oilaviy poliklinika,
- 923 ta oilaviy shifokor punkti,
- tuman, viloyat va respublika miqyosidagi barcha shifoxonalar,
- ixtisoslashtirilgan tibbiyot markazlari,
- tibbiyot oliy o‘quv yurtlari klinikalari.
Respublika Call-markazi (1003) orqali tibbiyotga tegishli savollarga malakali mutaxassislardan tun-u kun javob olish mumkin bo‘ladi. Koronavirusga ixtisoslashgan tibbiyot muassasalari, xususan, yuqumli kasalliklar shifoxonalari hamda PZR-test topshirishga mo‘ljallangan punktlar faoliyat ko‘rsatadi. Sanitariya-epidemiologiya xizmatining markaziy apparati va hududlardagi 14 ta boshqarma hamda 203 ta aholi punktida joylashgan bo‘limlarida ham 24 soat davomida 200 nafardan ziyod navbatchi shifokor, qariyb 200 nafarga yaqin vrach-laborant va yordamchi xodimlar o‘z faoliyatini davom ettiradi.
“Sog‘liqni saqlash vazirligi bayram va dam olish kunlarida uzluksiz mehnat qiladigan barcha tibbiyot xodimlariga o‘z minnatdorligini bildiradi”, — deyiladi xabarda.
Eslatib o‘tamiz, 9-iyul kuni mamlakatda Qurbon hayiti bayrami nishonlanadi. Shu va 10, 11, 12-iyul kunlari dam olish kuni deb belgilangan. Bu kunlari Toshkent shahrida jamoat transporti qisqartirilgan jadval asosida harakatlanadi.
Bundan tashqari, O‘zbekistondagi jome masjidlarda Qurbon hayiti namozini o‘qish vaqtlari ma’lum bo‘ldi. Toshkent shahri masjidlarida 2022-yil 9-iyul shanba kuni ertalab soat 05:20 da Qurbon hayiti namozi o‘qiladi. Namoz uchun masjidlarga maxsus avtobuslar yo‘lga qo‘yiladi.
Izoh (0)