Президентнинг тегишли қарорига кўра, Қурбон ҳайити байрами муносабати билан 9—12 июль саналарида кетма-кет дам олиш кунлари белгиланди. Соғлиқни сақлаш вазирлигининг хабар беришича, шу кунлари ҳам тиббиёт муассасалари тун-у кун ишлайди.
Қайд этилишича, байрам ва қўшимча ишланмайдиган кунларда мамлакатдаги тиббиёт муассасалари фаолиятини мувофиқлаштириб бориш мақсадида ССВда штаб ташкил этилган. Байрам ва қўшимча дам олиш кунларида қуйидаги даволаш-профилактика муассасаларида 40 минг нафар тиббиёт тизими ходими қонунда белгиланган тартибда, навбатчилик асосида аҳолига хизмат кўрсатади:
- 1010 та оилавий поликлиника,
- 923 та оилавий шифокор пункти,
- туман, вилоят ва республика миқёсидаги барча шифохоналар,
- ихтисослаштирилган тиббиёт марказлари,
- тиббиёт олий ўқув юртлари клиникалари.
Республика Call-маркази (1003) орқали тиббиётга тегишли саволларга малакали мутахассислардан тун-у кун жавоб олиш мумкин бўлади. Коронавирусга ихтисослашган тиббиёт муассасалари, хусусан, юқумли касалликлар шифохоналари ҳамда ПЗР-тест топширишга мўлжалланган пунктлар фаолият кўрсатади. Санитария-эпидемиология хизматининг марказий аппарати ва ҳудудлардаги 14 та бошқарма ҳамда 203 та аҳоли пунктида жойлашган бўлимларида ҳам 24 соат давомида 200 нафардан зиёд навбатчи шифокор, қарийб 200 нафарга яқин врач-лаборант ва ёрдамчи ходимлар ўз фаолиятини давом эттиради.
«Соғлиқни сақлаш вазирлиги байрам ва дам олиш кунларида узлуксиз меҳнат қиладиган барча тиббиёт ходимларига ўз миннатдорлигини билдиради», — дейилади хабарда.
Эслатиб ўтамиз, 9 июль куни мамлакатда Қурбон ҳайити байрами нишонланади. Шу ва 10, 11, 12 июль кунлари дам олиш куни деб белгиланган. Бу кунлари Тошкент шаҳрида жамоат транспорти қисқартирилган жадвал асосида ҳаракатланади.
Бундан ташқари, Ўзбекистондаги жоме масжидларда Қурбон ҳайити намозини ўқиш вақтлари маълум бўлди. Тошкент шаҳри масжидларида 2022 йил 9 июль шанба куни эрталаб соат 05:20 да Қурбон ҳайити намози ўқилади. Намоз учун масжидларга махсус автобуслар йўлга қўйилади.
Изоҳ (0)