Mis 19 oy ichida eng past bahoga tushdi. Bunga global retsessiya qo‘rquvi tovarlarga talabni pasaytirishda davom etayotgani sabab bo‘lgan. Bu haqda Bloomberg xabar bermoqda.
Qurilishdan tortib yangi energiya vositalarigacha bo‘lgan hamma narsada ishlatiladigan sanoat materiallari uchun qiziqish kamaymoqda.
Ayni paytda bir tonna mis allaqachon 8 ming dollardan past baholanmoqda. Metallar 2008-yildagi moliyaviy inqirozdan keyingi eng yomon choraklikni boshdan kechirib ulgurdi.
AQSH sanoatining kelajagi qanday bo‘lishini taxmin qilish tobora qiyinlashib bormoqda. Biz buni AQSH iqtisodiyoti jadal sur’atni yo‘qotayotganining belgisi sifatida izohlaymiz. Global tanazzulga oid xavotirlar metall bozorlarida yanada avj olmoqda, — deydi Commerzbank tahlilchisi Karsten Frish.
Bloomberg Economics’ning so‘nggi prognozlariga ko‘ra, AQSHning retsessiya ehtimoli hozirda 38 foizni tashkil qiladi.
Retsessiya — vaqtinchalik iqtisodiy pasayish davri bo‘lib, bu davrda savdo va sanoat faoliyati qisqaradi, odatda ikki chorakda yalpi ichki mahsulotning pasayishi bilan belgilanadi.
5-iyun kuni London metall birjasida mis narxi 5,1 foizga tushib, bir tonnasi 7 597 dollarni tashkil qildi, bu 2020-yil dekabr oyi boshidan beri eng past ko‘rsatkich.
Boshqa metallar orasida ham narxlarning pasayishi kuzatildi — alyuminiy 2,9 foiz va qalay 2,3 foiz pasaydi. Yashil rangni ko‘rsatgan birjadagi yagona metall bo‘lgan nikel 0,7 foizga oshdi.
Qimmatbaho metallar orasida oltin 2,2 foizga tushdi. Kumush 3,7 foizga, platina esa 2,5 foizga pastladi.
Izoh (0)