Gruziyaga sayohat uchun borganlarning doimo e’tiborida turadigan Eski shahar poytaxtning janubi-sharqidagi kichik bir hududni egallaydi, u yerda barcha yo‘llar birlashadi. U yerga Ozodlik maydonidagi metrodan (Rustaveli shohko‘chasi orqali) yoki Rustaveli metro bekatidan piyoda yurish orqali yetish mumkin.
Eski shaharning boshidan oxirigacha piyoda yurish taxminan 20 daqiqa vaqt oladi. Tezkor ekskursiya uchun taxminan 2 soat kifoya. Biroq sayyohlar kamida butun oqshom sayr qilishni ma’qul ko‘rishadi. Shaharning notekis yerlari mashaqqatli va hatto qisqa masofalar ham odatdagidan ko‘ra qiyinroq, shuning uchun poyabzal tanlashga alohida e’tibor berish va iloji boricha krossovka yoki keda kiyish kerak.
Tbilisining Eski shahar qismidagi eng gavjum, uzun ko‘cha bu Ozodlik maydonigacha davom etuvchi general Kote Abxazi ko‘chasi sanaladi. Ushbu yo‘l ko‘p asrlar davomida “Arman bozori” deb nomlangan jonli savdo joyi bo‘lib xizmat qilgan. Qadimgi kunlarda bu yerda ustaxonalar va savdo do‘konlari joylashgan. Endilikda bu yerda esdalik sovg‘alari, cherkov va gruzin vinolarini sotib olish mumkin. Asosiy diqqatga sazovor me’moriy joylari sirasiga turli diniy binolar: sinagoga, masjid, Grigorian va katolik cherkovlarini kiritish mumkin.
Tarixiy ko‘chalardan yana biri Shardeni 17-asrda Qora dengiz va Kolxida orqali Fors va Sharqiy Hindistonga olmos sotib olish uchun yo‘lga chiqqan fransuz sayohatchisi Jan Sharden sharafiga nomlangan. Zargar yo‘lda Tiflisda bo‘lib, kitobida shaharni rang-barang tasvirlab bergan. Ko‘cha barlar, qahvaxonalar va restoranlar bilan to‘la. Fotosessiyalardan charchagan sayyohlar odatda bu yerda chilim chekish va ovqatlardan tatib ko‘rish uchun to‘xtashadi. Ko‘chalardagi binolar uning fransuzcha nomini to‘la oqlaydi. Bu yerdagi uylar bir-biriga zich bo‘lib, yo‘laklarga o‘rnatilgan stollar esa xuddi Parijdagi kabi piyodalar harakatlanish joylarining yarmini egallaydi.
Sioni ko‘chasida Gruziyaga nasroniylikni olib kelgan Aziz Nina xochini saqlaydigan Sioni sobori bor. Sobordan unchalik uzoq bo‘lmagan joyda 15-asrga oid qo‘ng‘iroq minorasi joylashgan.
Botanika ko‘chasi Eski Tbilisining asosiy sayyohlik yo‘nalishlaridan biri bo‘lib, sayohatchilarga estetik zavq bag‘ishlaydi. Shahar aynan Botanika va Abitubani ko‘chalari tomondan boshlab qurib kelingan. Ko‘cha katta ehtimol bilan 5-asrdayoq mavjud bo‘lgan. Narikala qal’asiga asos solingan vaqtni aniq aniqlashning iloji bo‘lmadi, biroq ilk qaydla IV asrga to‘g‘ri keladi. Narikala qal’asidan shaharning 360 darajali panoramasini ko‘rish mumkin. U yerga funikulyorli dor yo‘li orqali borish mumkin.
Ko‘plab buyuk shoir va yozuvchilar sokin vayronalar orasida kezib yurishdan ilhom olganlar. Aleksandr Dyuma, Boris Pasternak, Maksim Gorkiy, Bella Axmadulina, Osip Mandelshtam ko‘plab samimiy satrlarni aynan ushbu shaharga bag‘ishlagan.
Izoh (0)