Buyuk Britaniya Belarusdan qurol import qilishni taqiqladi

Buyuk Britaniya Belarusdan qurol-yarog‘ va tegishli materiallarni import qilishni taqiqladi. Bu haqda mamlakat hukumati saytida xabar berilgan.

“Qurol va tegishli materiallarni olib kirish taqiqlandi. Taqiq Belarusda ishlab chiqarilgan yoki u yerdan jo‘natilgan tovarlarga nisbatan qo‘llaniladi. Bu shuni anglatadiki, agar tovarlarning to‘g‘ridan to‘g‘ri jo‘natiladigan joyi Belarus bo‘lmasa ham, taqiq qo‘llanilishi mumkin”, — deyiladi bayonotda.

Bundan tashqari, Buyuk Britaniyaning Belarusdan po‘lat va temir mahsulotlari, minerallar va kaliy karbonat importini taqiqlash haqidagi sanksiyalari ham kuchga kirdi. Minskka qarshi yangi cheklov choralari 60 million funt sterling qiymatidagi mahsulotlarni nishonga oladi, dedi Britaniya rasmiylari.

London Minskka qarshi yangi sanksiyalar joriy etilishini Belarus rasmiylari Rossiyaning Ukrainadagi bosqiniga “faol hissa qo‘shishda davom etayotgani” bilan izohlagan. Shu bilan birga, Belarus prezidenti Aleksandr Lukashenko Belarus harbiylari jangovar harakatlarda qatnashmagani va buyog‘iga ham qatnashmasligni bir necha bor ta’kidlagan. Uning so‘zlariga ko‘ra, Minsk mojaroga qo‘shilmoqchi emas, chunki “buning hojati yo‘q”. May oyida Belarus qo‘shinlarining kutilmgan hujumlarga tayyorligini tekshira boshladi, iyun oxirida esa Ukraina bilan chegaralar yaqinida “safarbarlik mashqlari” o‘tkazildi.

Belarus Iqtisodiyot vazirligi G‘arb sanksiyalarini “iqtisodiy genotsid” deb nomlagan. Lukashenko Rossiya va Belarus sanksiyalar bosimiga dosh bera olishiga, boshqa davlatlar esa cheklovchi choralarni “qanday yengish kerakligini ulardan o‘rganishiga” ishonch bildirgan.