APL va Angliya terma jamoasi futbolchisi hibsga olindi. U jinsiy zo‘ravonlikda gumon qilinmoqda

APL futbolchisi jinsiy zo‘ravonlikda gumon qilinib, hibsga olingan.

The Telegraph’ning xabar berishicha, Angliya terma jamoasi futbolchisi iyun oyida notanish ayolga hujum qilgani uchun 5-iyul kuni Shimoliy Londonda, Barnet okrugida qo‘lga olingan.

Yuridik sabablarga ko‘ra ismi oshkor etilmagan, yoshi 30 lar atrofidagi o‘yinchi hozirda hibsda. U jinsiy zo‘ravonlikda gumonlanib, so‘roq qilinmoqda.

Skotland-Yard futbolchining qo‘lga olinganini tasdiqladi. The Telegraph vaziyatdan xabardor bo‘lgan futbolchining klubi bilan ham bog‘langan. Ammo klub izoh berishdan bosh tortgan.

“4-iyul kuni politsiyaga 20 yoshli qizga jinsiy tajovuz qilingani haqida ariza kelib tushgan. Taxmin qilingan zo‘ravonlik 2022-yil iyun oyida sodir bo‘lgan. Voqea holatini tekshirish davom etmoqda”, — deyiladi London politsiyasi bayonotida.

Nashrning ta’kidlashicha, gap dunyoga mashhur futbolchi haqida ketmoqda va u endi jamoasining mavsumoldi yig‘inlarida ishtirok etish yoki ishtirok etmasligi aniq emas. APL 5-avgustdan start oladi.

Avvalroq “Manchester Siti” himoyachisi Benjamen Mendiga jinsiy zo‘ravonlik bo‘yicha 10 ta ayblov qo‘yilgani xabar qilingandi.