АПЛ ва Англия терма жамоаси футболчиси ҳибсга олинди. У жинсий зўравонликда гумон қилинмоқда

АПЛ футболчиси жинсий зўравонликда гумон қилиниб, ҳибсга олинган.

The Telegraph’нинг хабар беришича, Англия терма жамоаси футболчиси июнь ойида нотаниш аёлга ҳужум қилгани учун 5 июль куни Шимолий Лондонда, Барнет округида қўлга олинган.

Юридик сабабларга кўра исми ошкор этилмаган, ёши 30 лар атрофидаги ўйинчи ҳозирда ҳибсда. У жинсий зўравонликда гумонланиб, сўроқ қилинмоқда.

Скотланд-Ярд футболчининг қўлга олинганини тасдиқлади. The Telegraph вазиятдан хабардор бўлган футболчининг клуби билан ҳам боғланган. Аммо клуб изоҳ беришдан бош тортган.

«4 июль куни полицияга 20 ёшли қизга жинсий тажовуз қилингани ҳақида ариза келиб тушган. Тахмин қилинган зўравонлик 2022 йил июнь ойида содир бўлган. Воқеа ҳолатини текшириш давом этмоқда», — дейилади Лондон полицияси баёнотида.

Нашрнинг таъкидлашича, гап дунёга машҳур футболчи ҳақида кетмоқда ва у энди жамоасининг мавсумолди йиғинларида иштирок этиш ёки иштирок этмаслиги аниқ эмас. АПЛ 5 августдан старт олади.

Аввалроқ «Манчестер Сити» ҳимоячиси Бенжамен Мендига жинсий зўравонлик бўйича 10 та айблов қўйилгани хабар қилинганди.