Шавкат Мирзиёев 4 июль куни Европа кенгаши президенти Шарл Мишел билан телефон орқали мулоқот қилди. Бу ҳақда Президент матбуот хизмати хабар қилди.
Қайд этилишича, Ўзбекистон ва Европа Иттифоқи ўртасидаги кўп қиррали ва ўзаро манфаатли ҳамкорликни кенгайтириш масалалари кўриб чиқилган. Суҳбат аввалида давлат раҳбари Ўзбекистонда демократик ва ижтимоий-иқтисодий янгиланишларни амалга оширишга кўрсатилаётган ҳар томонлама кўмак учун миннатдорлик билдирган. Еврокенгаш президенти, ўз навбатида, Ўзбекистоннинг кучли фуқаролик жамияти ва ҳуқуқий давлат қуриш борасидаги саъй-ҳаракатларини қўллаб-қувватлаган.
Қорақалпоғистондаги вазиятнинг баъзи бузғунчи кучлар томонидан издан чиқарилишига йўл қўйиб бўлмаслиги алоҳида қайд этилган. Шарл Мишел жиноий унсурлар томонидан уюштирилган тартибсизликлар оқибатида қурбон бўлганларнинг оилалари ва яқинларига ҳамдардлик сўзларини етказишни сўраган.
Суҳбат чоғида Ўзбекистон ва ЕИ ўртасида Кенгайтирилган шериклик ва ҳамкорлик тўғрисидаги битимнинг тайёрланишини якунига етказиш масаласига эътибор қаратилган. «Преференциялар бош тизими плюс» афзалликларидан фойдаланган ҳолда ўзаро савдо ва инвестицияларни кўпайтириш муҳимлиги таъкидланган. Томонлар амалий ҳамкорликнинг аниқ дастур ва лойиҳаларини, «яшил иқтисодиёт», рақамлаштириш, инновациялар, логистика, қишлоқ хўжалиги, экология, таълим ва соғлиқни сақлаш соҳаларида илгари суриш масалаларига тўхталган.
Марказий Осиё минтақасида юзага келаётган вазият ҳамда ЕИ тузилмалари билан кўп томонлама мулоқотнинг даражасини ошириш юзасидан фикр алмашилган. Ўзаро боғлиқликни кучайтириш, шунингдек, минтақада хавфсизлик ва барқарорликни таъминлаш, шу жумладан, Афғонистонда мустаҳкам тинчлик қарор топишига кўмаклашиш ва унинг халқига қўлдан келганча ёрдам кўрсатишга қаратилган йирик халқаро тадбирларни Ўзбекистонда ташкил этиш масаласи қўллаб-қувватланган.
Бундан ташқари, Европа Иттифоқи матбуот котиби Ўзбекистонда юз берган сўнгги воқеалар бўйича баёнот берди.
«Европа Иттифоқи Қорақалпоғистонда Ўзбекистон Конституциясига таклиф этилаётган тузатишлар эълон қилинганидан кейин содир бўлган зўравонлик воқеаларини очиқ ва мустақил тергов қилишга чақиради. Биз қурбонлар борлигидан чуқур афсусдамиз ва воқеалар ривожини диққат билан кузатишда давом этамиз.
Президент Мирзиёев томонидан таклиф этилаётган Конституцияга ўзгартиришлар киритиш юзасидан жамоатчиликнинг хавотирларига тезкорлик билан муносабат билдириш бўйича кўрилган чораларни эътироф этамиз. Биз барча томонларни куч ишлатиш ёки зўравонликларни давом эттиришнинг олдини олиш мақсадида ўз ҳаракатларида вазминлик кўрсатишга чақирамиз. Европа Иттифоқи расмийларни Ўзбекистоннинг халқаро мажбуриятларига мувофиқ инсон ҳуқуқлари, жумладан, сўз эркинлиги ва йиғилишлар эркинлиги каби асосий ҳуқуқларни кафолатлашга чақиради.
Европа Иттифоқи Ўзбекистон билан мустаҳкам ва ривожланиб бораётган ҳамкорликка эга. Биз мамлакатда олиб борилаётган саъй-ҳаракатларини қўллаб-қувватлаш тарафдоримиз ва уни халқаро нормалар ҳамда илғор тажрибалар асосида фуқаролар, манфаатдор томонлар билан маслаҳатлашган ҳолда ушбу жараённи давом эттиришга чақирамиз», — дейилади хабарда.
Изоҳ (0)