Burger King xodimi restoranda 27 yil ishlagan va umuman navbatchilikdan qolmagan. Kompaniya unga bitta kino chiptasi va bir stakan Starbucks stakanini sovg‘a qildi, deb yozadi “Pravila jizni” nashri.
Bu haqda xabar topgan internet foydalanuvchilari Burger King xodimi uchun taxminan 300 ming dollar yig‘gan. Hozirda 54 yoshda bo‘lgan Kevin Ford 27 yildan beri Las-Vegas aeroportidagi Burger King’da oshpaz va kassir bo‘lib ishlaydi. Shuncha yillar davomida u birorta ham navbatchilikni o‘tkazib yubormagan.
Fox 11 nashrining ma’lumotlariga ko‘ra, xodimning ish faoliyatidagi yubileyi o‘tgan hafta boshida nishonlanishi kerak edi, ammo hech kim bunga unchalik ahamiyat bermagan. Ford o‘z hamkasblariga Burger King’da qancha vaqt davomida ishlab kelayotganini aytganida rahbariyat unga minnatdordorchilik belgisi sifatida kichik sovg‘a tayyorlagan.
Fidoyi ishchiga Starbucks stakani, Reese’s shokoladi, Life Savers konfeti, kalit zanjirlar, ikkita qalam va bitta kino chiptasi bo‘lgan sumka berilgan. Kevin sovg‘a qutisini ochish jarayoni aks etgan videoni ijtimoiy tarmoqqa joylashtirgan. Video juda tez ijtimoiy tarmoqlarga tarqaldi va ko‘plab muhokamalarga sabab bo‘ldi. Ijtimoiy tarmoq foydalanuvchilari xodimga berilgan oddiy sovg‘adan g‘azablangan va oxir-oqibat Ford uchun taxminan 300 000 dollar yig‘gan.
Kevinning qizlari GoFundMe nomli mablag‘ yig‘ish sahifasini ochgan.
“Ushbu videodagi inson mening otam. U 27 yildan buyon o‘z lavozimida ishlab, bir kun ham ishdan qolmagan. Otam 27 yil oldin meni va katta opamni o‘z qaramog‘iga olgach, yolg‘iz ishlay boshladi. Keyinroq biz katta bo‘lganimizda u yana turmush qurdi va a’lo darajadagi tibbiy sug‘urta tufayli restoranda ishlashni davom ettirdi” —, deydi Kevin Fordning qizi Serina.
To‘satdan kelgan shon-shuhrat tufayli Kevin NBC telekanalining Today ko‘rsatuvida ham qatnashdi va nabiralari bilan jonli efirda diydorlashish imkoniga ega bo‘ldi.
“Men nevaralarimni to‘rt yildan ortiq vaqt davomida ko‘rmadim”, — deydi Ford.
Kevin Fordning aytishicha, xodim hozircha nafaqaga va ta’tilga chiqmoqchi emas. U ayni damda bor e’tiborini oilasiga qaratgan.
Izoh (0)