Ukraina uchun xavfsizlik xalqaro kafolatlariga Rossiyaga qarshi sanksiyalar haqidagi blok kiritilishi kerak. Bu haqda Ukraina prezidenti ofisi rahbari Andrey Yermak ma’lum qildi, deb yozadi “RBK”.
Yermakning so‘zlariga ko‘ra, sanksiya siyosati haqidagi blok yangi nizolar oldini olishda samarali vositaga aylanishi kerak. Uning fikricha, ikkita shart bajarilmaguniga qadar Rossiyaga qarshi sanksiyalar amal qilishda davom etadi.
“Birinchidan, Rossiya Ukrainaga qarshi tajovuz takrorlanmasligi bo‘yicha tegishli va’dalar va kafolatlar berishi kerak. Ikkinchidan, u davlatimiz va fuqarolarimizga yetkazilgan zarar to‘liq qoplanishini ta’minlashi kerak”, — dedi Yermak.
Uning so‘zlariga ko‘ra, kafolatlar, shuningdek, Ukrainaga “hech qanday cheklovlar va siyosiy mazmundagi to‘siqlarsiz” qurol-yarog‘ va jangovar texnikani yetkazishda davom etish; “Ukrainaga qarshi tajovuz bo‘lgan taqdirda kafillar xatti-harakatlarining batafsil mexanizmini ko‘zda tutuvchi” shartnomalar tizimlarini yaratish; mudofaa sektorini rivojlantirish uchun yillik moliyaviy ko‘mak; xavfsizlikka tahdidlarni baholash doimiy mexanizmi haqidagi bloklarni ham o‘z ichiga olishi kerak.
“Ukraina Budapesht memorandumi doirasida xavfsizlik haqidagi va’dalar bo‘yicha o‘ta salbiy tajribaga ega. Biz uni takrorlashdan qat’iyan bosh tortamiz. ‘Budapesht-2’ga yo‘l qo‘ymaymiz”, — deya xulosa qildi Yermak.
Kiyev Ukraina uchun xavfsizlik xalqaro kafolatlarini ishlab chiqish bo‘yicha ekspertlar guruhini tuzdi, uning birinchi yig‘ilishi 1-iyul kuni bo‘lib o‘tdi. Guruhga Andrey Yermak va NATO sobiq bosh kotibi Anders Fog Rasmussen (u sobiq prezident Pyotr Poroshenkoning maslahatchisi bo‘lgan) rahbarlik qildi.
Ukraina neytral (betaraflik) maqomni e’lon qilib, NATOga intilishdan voz kechish evaziga xavfsizlik bo‘yicha xalqaro kafolatlarni talab qilmoqda. Kiyev fikricha, BMT Xavfsizlik kengashining doimiy a’zolari, shu jumladan, Rossiya, shuningdek, Turkiya, Germaniya, Italiya, Isroil, Polsha va Kanada kafillar bo‘lishi mumkin.
Rossiya tashqi ishlar vaziri Sergey Lavrov aprelda xavfsizlik kafolatlari faqat Ukrainaga emas, butun Yevropa mamlakatiga va Rossiyaga ham taqdim etilishi kerakligini aytgandi.
AQSH Davlat departamenti avvalroq Rossiyaga qarshi sanksiyalarning yumshatilishi Rossiya-Ukraina bitimiga (bu bo‘yicha muzokaralar may o‘rtalarida to‘xtab qolgan) kiritilishi mumkinligini ma’lum qilgandi. Davlat kotibi Entoni Blinken Vashington Kiyevning istaklariga qarashini, agar u cheklovlarning bekor qilinishi jangovar harakatlar to‘xtashiga olib keladi, deb hisoblasa, AQSH shunday qilishini aytgandi. Germaniya kansleri Olaf Shols ham Rossiyaga qarshi cheklovlar faqat Ukraina bilan kelishilgan holda bekor qilinishini ta’kidlagandi.
Izoh (0)