2022-yilning birinchi yarim yilligida dunyoning 500 nafar eng badavlat odamlari boyligining umumiy miqdori 1,4 trillion dollarga qisqardi — bu hali tarixda kuzatilmagan maksimum natija, deya xabar bergan Bloomberg.
Agentlik hisob-kitoblariga ko‘ra o‘tgan vaqt davomida Facebook asoschisi Mark Sukerberg 65,5 milliard dollar yo‘qotgan, Amazon asoschisi Jeff Bezos — 63 milliard dollar, Tesla hamda SpaceX asoschisi Ilon Mask — 62 milliard, Louis Vuitton Moët Hennessy bosh direktori Bernar Arno 49,3 milliard dollardan mahrum bo‘lgan.
Shunga qaramay yuqorida qayd etilgan milliarderlarning hammasi Bloomberg Billionaires Index reytingida o‘z o‘rnini saqlab qolgan. Mask 208 milliard dollar bilan birinchi, Bezos ikkinchi (130 milliard dollar), Arno uchinchi pog‘onani (129 milliard dollar) egallab turibdi.
2022-yildagi vaziyat oxirgi ikki yil davomida kuzatilgan holatlardan keskin farq qiladi, 2020–2021-yillarda milliarderlarning boyligi ko‘paygandi, deyiladi Bloomberg tahlilida. Agentlik ularning ushbu davrda yanada boyib ketishiga hukumatlarning, turli mamlakatlardagi markaziy banklarning koronavirus pandemiyasi sharoitida biznesga imtiyozlar taqdim qilgani bilan izohlagan.
Izoh (0)