Украина учун хавфсизлик халқаро кафолатларига Россияга қарши санкциялар ҳақидаги блок киритилиши керак. Бу ҳақда Украина президенти офиси раҳбари Андрей Ермак маълум қилди, деб ёзади «РБК».
Ермакнинг сўзларига кўра, санкция сиёсати ҳақидаги блок янги низолар олдини олишда самарали воситага айланиши керак. Унинг фикрича, иккита шарт бажарилмагунига қадар Россияга қарши санкциялар амал қилишда давом этади.
«Биринчидан, Россия Украинага қарши тажовуз такрорланмаслиги бўйича тегишли ваъдалар ва кафолатлар бериши керак. Иккинчидан, у давлатимиз ва фуқароларимизга етказилган зарар тўлиқ қопланишини таъминлаши керак», — деди Ермак.
Унинг сўзларига кўра, кафолатлар, шунингдек, Украинага «ҳеч қандай чекловлар ва сиёсий мазмундаги тўсиқларсиз» қурол-яроғ ва жанговар техникани етказишда давом этиш; «Украинага қарши тажовуз бўлган тақдирда кафиллар хатти-ҳаракатларининг батафсил механизмини кўзда тутувчи» шартномалар тизимларини яратиш; мудофаа секторини ривожлантириш учун йиллик молиявий кўмак; хавфсизликка таҳдидларни баҳолаш доимий механизми ҳақидаги блокларни ҳам ўз ичига олиши керак.
«Украина Будапешт меморандуми доирасида хавфсизлик ҳақидаги ваъдалар бўйича ўта салбий тажрибага эга. Биз уни такрорлашдан қатъиян бош тортамиз. ‘Будапешт-2’га йўл қўймаймиз», — дея хулоса қилди Ермак.
Киев Украина учун хавфсизлик халқаро кафолатларини ишлаб чиқиш бўйича экспертлар гуруҳини тузди, унинг биринчи йиғилиши 1 июль куни бўлиб ўтди. Гуруҳга Андрей Ермак ва НАТО собиқ бош котиби Андерс Фог Расмуссен (у собиқ президент Пётр Порошенконинг маслаҳатчиси бўлган) раҳбарлик қилди.
Украина нейтрал (бетарафлик) мақомни эълон қилиб, НАТОга интилишдан воз кечиш эвазига хавфсизлик бўйича халқаро кафолатларни талаб қилмоқда. Киев фикрича, БМТ Хавфсизлик кенгашининг доимий аъзолари, шу жумладан, Россия, шунингдек, Туркия, Германия, Италия, Исроил, Польша ва Канада кафиллар бўлиши мумкин.
Россия ташқи ишлар вазири Сергей Лавров апрелда хавфсизлик кафолатлари фақат Украинага эмас, бутун Европа мамлакатига ва Россияга ҳам тақдим этилиши кераклигини айтганди.
АҚШ Давлат департаменти аввалроқ Россияга қарши санкцияларнинг юмшатилиши Россия-Украина битимига (бу бўйича музокаралар май ўрталарида тўхтаб қолган) киритилиши мумкинлигини маълум қилганди. Давлат котиби Энтони Блинкен Вашингтон Киевнинг истакларига қарашини, агар у чекловларнинг бекор қилиниши жанговар ҳаракатлар тўхташига олиб келади, деб ҳисобласа, АҚШ шундай қилишини айтганди. Германия канцлери Олаф Шольц ҳам Россияга қарши чекловлар фақат Украина билан келишилган ҳолда бекор қилинишини таъкидлаганди.
Изоҳ (0)