Eron janubidagi Hurmuzgon viloyatida zilzila yuz berdi, oqibatda besh kishi halok bo‘lib, 44 kishi jabrlandi, deb yozadi “Interfaks” mahalliy OAVlarga tayanib.
Yevropa-O‘rtayer dengizi seysmologiya markazi ma’lumotlariga ko‘ra, zilzila magnitudasi 6 ga teng bo‘lgan. Epimarkaz Hurmuzgondagi Bender-Lenge shahridan 61 km shimoli-sharqda, 10 km chuqurlikda joylashgan.
Zilzila 2-iyul, shanbaga o‘tar kechasi Toshkent vaqti bilan 2:32 da sodir bo‘lgan. Eron OAVlari zilzila kuchini 6,1 ballga baholadi.
Birinchi yer osti silkinishidan keyin aftershoklar kuzatildi, ularning eng kuchlisi 6,2 magnitudaga teng bo‘ldi.
Eslatib o‘tamiz, 22-iyunga o‘tar kechasi Afg‘onistonning janubi-sharqiy mintaqasida 6,1 magnitudali zilzila sodir bo‘ldi. Buning oqibatida 1,5 ming kishi halok bo‘lgan, 2 ming kishi jarohatlangan, minglab inshootlar vayron bo‘lgan.
Izoh (0)