AQSHning Virjiniya shtati, Chesterfild okrugi politsiyasi 28-iyun kuni ertalab 18 oylik bola bir necha soat davomida mashinada qarovsiz qoldirilgani haqida xabar oldi, deyiladi departament bayonotida. Keyin politsiya bolaning otasi Midlotian shahridagi uyida “o‘z joniga qasd qilgani” haqida qo‘shimcha ma’lumot oldi.
Voqea joyiga yetib kelgan politsiya uy ichida bolaning jasadini, “uy orqasidagi o‘rmonda esa o‘zini otib tashlagan katta yoshli erkakning jasadini topdi”, deyiladi bayonotda.
Tergov shuni ko‘rsatadiki, “ota tasodifan bolani bir necha soat davomida mashinada qoldirib ketgan”.
“Ota mashinada bolaning o‘ligini topgach, uyiga qaytib, bolani ichkariga olib kirgan. Keyin uydan chiqib, o‘zini otib o‘ldirgan”, — deyiladi xabarda.
Politsiya go‘dakning o‘limi sababini aniqlamadi, biroq Richmonddan 32 kilometr g‘arbda joylashgan Midlotian shahrida 28-iyun kuni havo harorati 28 daraja atrofida bo‘lgan.
Milliy Xavfsizlik Kengashi ma’lumotlariga ko‘ra, har yili 15 yoshgacha bo‘lgan o‘rtacha 38 nafar bola mashinada qolib ketib, keyin issiq urishdan vafot etadi.
Bolalarda tana harorati kattalarnikiga qaraganda ancha tez ko‘tariladi va harorati 40 darajaga yetganida ularni issiq urishi mumkin. AQSH Milliy yo‘l harakati xavfsizligi boshqarmasi ma’lumotlariga ko‘ra, 41,6 daraja tana harorati o‘limga olib kelishi mumkin.
Izoh (0)