АҚШнинг Виржиния штати, Честерфилд округи полицияси 28 июнь куни эрталаб 18 ойлик бола бир неча соат давомида машинада қаровсиз қолдирилгани ҳақида хабар олди, дейилади департамент баёнотида. Кейин полиция боланинг отаси Мидлотиан шаҳридаги уйида «ўз жонига қасд қилгани» ҳақида қўшимча маълумот олди.
Воқеа жойига етиб келган полиция уй ичида боланинг жасадини, «уй орқасидаги ўрмонда эса ўзини отиб ташлаган катта ёшли эркакнинг жасадини топди», дейилади баёнотда.
Тергов шуни кўрсатадики, «ота тасодифан болани бир неча соат давомида машинада қолдириб кетган».
«Ота машинада боланинг ўлигини топгач, уйига қайтиб, болани ичкарига олиб кирган. Кейин уйдан чиқиб, ўзини отиб ўлдирган», — дейилади хабарда.
Полиция гўдакнинг ўлими сабабини аниқламади, бироқ Ричмонддан 32 километр ғарбда жойлашган Мидлотиан шаҳрида 28 июнь куни ҳаво ҳарорати 28 даража атрофида бўлган.
Миллий Хавфсизлик Кенгаши маълумотларига кўра, ҳар йили 15 ёшгача бўлган ўртача 38 нафар бола машинада қолиб кетиб, кейин иссиқ уришдан вафот этади.
Болаларда тана ҳарорати катталарникига қараганда анча тез кўтарилади ва ҳарорати 40 даражага етганида уларни иссиқ уриши мумкин. АҚШ Миллий йўл ҳаракати хавфсизлиги бошқармаси маълумотларига кўра, 41,6 даража тана ҳарорати ўлимга олиб келиши мумкин.
Изоҳ (0)