Ijtimoiy tarmoqlarda Surxondaryo viloyati hokimi To‘ra Bobolov ishtirokidagi “Birontang internetga chiqarma”, deb nomlangan video tarqaldi. Surxondaryo viloyati hokimligi axborot xizmati mazkur holatga izoh berib, voqea joyini aniqlashtirdi.
“Mazkur video kuni-kecha nikoh to‘yi bo‘lib o‘tgan ‘Tokio–2020’ Paralimpiya o‘yinlari oltin medali sohibasi Guljanoy Naimova xonadonida tasvirga olingan. Viloyat hokimi mashhur para-taekvondochi Guljanoy Naimovani tabriklash uchun tuman hokimi bilan birga uning uyiga borganida haqiqatan ham uch-to‘rt nafar yoshlarning jarayonni telefonda tasvirga olishni boshlaganini ko‘rib, ularga ‘Birontang internetga chiqarma’, deya murojaat qilgan. Chunki, vohada viloyat hokimining amalga oshirayotgan ishlari va har bir xatti-harakatini ijtimoiy tarmoqqa chiqarib, PR yasash odatiy holga aylandi”, — deyiladi hokimlik ma’lumotida.
Hokimlik hokim piari bilan bog‘liq ma’lumotlar o‘z vaqtida jamoatchilikka yetkazib turilganini ma’lum qilib, To‘ra Bobolovning xayrli amallari har doim ham jamoatchilikka oshkor qilinmasligini yozmoqda.
“Ommaviy axborot vositalari va ijtimoiy tarmoqda o‘zini ko‘p reklama qilishdan istihola qiladigan hokim viloyatda bajarayotgan ayrim xayrli ishlarini keng jamoatchilikka ko‘rsatishdan tiyilib turadi. Lozim bo‘lgan hollarda ijtimoiy tarmoq orqali o‘zi ham chiqishlar qilib, voqea-hodisalarni xalqimizga yetkazayotganini barcha yaxshi biladi. Mezbonlarga bu gap ana shu ma’noda aytilgan bo‘lib, uni ijtimoiy tarmoq foydalanuvchilari boshqa yo‘sinda talqin qilishi milliy qadriyatlarimiz va insoniylik fazilatlarimizga to‘g‘ri kelmaydi. Aslida ham ‘Tokio–2020’ Paralimpiya o‘yinlarida g‘oliblik shohsupasiga ko‘tarilib, viloyatimiz, mamlakatimiz dovrug‘ini dunyoga keng tarannum etgan Guljahon Naimova surxondaryoliklar faxriga aylandi. Viloyat hokimi ana shunday shijoatkor yigit-qizlarning quvonchli kunlariga sherik bo‘lib, ularga motivatsiya berishni o‘z burchi, deb biladi”, — deyiladi hokimlik rasmiy munosabatida.
Izoh (0)