Rossiya Havo-kosmik kuchlari 27-iyun kuni Kremenchugda yuqori aniqlikdagi raketalar bilan “AQSH va Yevropa mamlakatlaridan kelib tushgan qurol-yarog‘ va o‘q-dorilar saqlanadigan omborga” zarba bergan. Ushbu omborlar Kremenchug yo‘l mashinalari zavodi yaqinida joylashgan bo‘lgan. Bu haqda muassasa brifing chog‘ida ma’lum qildi, deb yozadi Meduza.
“Yuqori aniqlikdagi zarba natijasida, G‘arbda ishlab chiqarilgan va Donbassdagi Ukraina qo‘shinlari guruhlariga yuborish uchun ombor hududiga joylashtirilgan qurol-yarog‘ va o‘q-dorilar nishonga olindi. G‘arb qurollarining o‘q-dorilari portlab ketishi zavod hududi yaqinida joylashgan, faoliyat olib bormayotgan savdo markazida yong‘in kelib chiqishiga sabab bo‘ldi”, — deyildi brifingda.
Avvalroq Ukraina prezidenti Vladimir Zelenskiy Rossiyani Poltava viloyatining Kremenchug shahridagi “Amstor” savdo markaziga raketa bilan zarba berishda aybladi. Uning so‘zlariga ko‘ra, hujum chog‘ida binoda mingdan ortiq odam bo‘lgan. So‘nggi ma’lumotlarga ko‘ra, 20 kishi halok bo‘lib, 59 kishi jabrlangan, 30 kishi bedarak yo‘qolgan.
Ukraina harbiylari da’vo qilishicha, Kremenchugga Kursk viloyatidan turib uzoq masofali Tu-22 M3 bombardimonchi samolyotlar yordamida ikkita X-22 raketalari bilan zarba berilgan. 28—30-iyun kunlari Kremenchugda savdo markazida halok bo‘lganlar xotirasiga motam e’lon qilindi.
Izoh (0)