Украинанинг Херсон вилояти Россияга қўшилиш ҳақида референдум ўтказишга тайёрланишни бошлади, ҳудуд тўлақонли субъектга айланади. Бу ҳақда ҳарбий-фуқаролик маъмурияти раҳбари ўринбосари Кирилл Стремоусов ўз Telegram-каналида маълум қилди, деб ёзади «РБК».
«Биз референдумга тайёрланяпмиз ва биз уни ўтказамиз. Херсон вилояти қарор қабул қилиб, Россияга қўшилади ва тўлақонли субъектга айланади, у шунчаки кўп миллатли халқлар ёнма-ён яшайдиган эмас, Россия халқлари ягона, ҳамжиҳат, бутун, бир оила каби яшайдиган ягона давлат бўла олади», — деди Стремоусов.
Россия ҳарбийлари Украинанинг Херсон вилоятини назорат остига олгани ҳақида Россия Мудофаа вазирлиги март ўрталарида маълум қилган эди. Шундан кейин вилоятда ҳарбий-фуқаролик маъмурияти тузилди, Россия телеканаллари узатила бошлади, гривна билан бир қаторда рубль муомалага киритилди, йирик Россия банклари очилиши эълон қилинди ва Россия паспортларини берадиган марказлар ташкил қилина бошлади.
Ҳарбий-фуқаролик маъмурияти вакиллари Херсон вилоятининг Россия таркибига киришини ёқлаб бир неча марта чиқиш қилган. Стремоусов вилоятда кузда референдум ўтказилишини айтганди.
Россия бош вазири ўринбосари Марат Хуснуллин Херсон вилояти ҳақида гапираётиб, у «Россия оиласида катта истиқбол ва муносиб ўрин»га эга эканини айтганди. Президент матбуот котиби Дмитрий Песков Россияга қўшилиш ҳақида референдум ўтказиш шартлари сифатида Украина ҳудудларининг хавфсизликни таъминлаши ва маҳаллий аҳолининг истагини айтиб ўтганди.
Эслатиб ўтамиз, аввалроқ Украинанинг Херсон шаҳрига раҳбарлик қилиб келган Игорь Колихаев қўлга олингани ҳақида Херсон вилоятининг ҳарбий-фуқаролик маъмурияти раҳбари ўринбосари Кирилл Стремоусов маълум қилганди.
Изоҳ (0)